هذه قصيدة تحكي قصة مأساوية حدثت لسلطان بن رباح الذي كان له أخ لم تلده أمه أخ دنيا ودين هو محمد بن عقيل وكانت صداقتهم على وضح النقا ومن كثر ما يكنه سطان لأخيه وصديقه محمد أسمى ابنه البكر محمد على اسم صديقه وكانا يشتركان في حبهما لهواية الصيد وفي احدى رحلاتهما للصيد وفي وقت الظهيرة كان محمد يجهز الغداء وسلطان ينظف السلاح ومن غير قصد وبدون علم بوجود الطلقة في مخزن السلاح انطلقت الرصاصة لتسكن في قلب محمد وترديه صريعا ولم يكن عندهما أحد ليشهد بما حدث فعاد سلطان لأهلهما وأخبرهم بما حصل فتم ايداع سلطان في السجن بتهمة القتل وبدأت المشايخ والوساطات بالتوافد على أهل محمد كي يصفحوا عن سلطان ولكن بدون جدوى وصدر الحكم عليه بالقصاص وبعد تنفيذ الحكم ومصادفة ً أصبح قبر سلطان ملاصقا لقبر صديقه محمد ، وهذه القصيدة تحكي ما حدث بالتفصيل حيث قال شاعرها
يا فلاح الهم خيّم فـوق قلبـي يـا فـلاح=كيف تبغاني اسولف وانت خابرنـي عليـل
ويش قولك في عليل ٍ في حياته ما استراح=تنتثر دمعة عيونه لا ظلّـم الليـل الطويـل
حالته لا ما تباعد حـال سِلطـان الربـاح=بالخطأ راحت حياته والخطـأ مالـه مثيـل
كان ويّا صاحبه اثنين فـي أرض ٍ بـراح=يطردون الصيد دايم من صُبح لين المقيـل
إجمعتهم صحبة الدنيا علـى جِـد ومـزاح=ما يهابون الليالـي والحمـول اللـي تميـل
ما قتَل عامد ولكن ثـوّر ابليـس السـلاح=بالخطأ ثار السلاح وين يلقـى لـه دليـل
إنعقد سجنه وربعه تنتظـر فـك السـراح=والأكيد إنه سجين وما رضوا ربـع القتيـل
هل دمعه يوم صلـى ركعتيـن فالصبـاح=في نهار الجمعة اللي من ثقيل ٍ فـي ثقيـل
هلّل وكبّر ونفسـه تذكـر اللـي راح راح=كان في ربعه عزيز وذلّه الوقـت الذليـل
لا محمد لا تهانـي لا سعـود ولا صـلاح=كلهم كانوا على بالـه وهمّـه فـي هديـل
طفلة ٍ ما كمّلت عاميـن صايبهـا كسـاح=وانتثر دمعه وحالـه مـن سبايبهـا نحيـل
حان تنفيذ القصاص وغطوا الراس بوشـاح=وجاك سيّافه يشيل السيف ابو حد ٍ صقيـل
ارتخى راسه وزاد الموقف الحامي صيـاح=بين نوح وبين دمع وبين صيحات وعويـل
وارتفع صوت الحشود وزاده محمد وصاح=يا يبه تكفى دخيلك تستمـع قـول الدخيـل
يا يبه وشلون نصبر كيف نهجـع بارتيـاح=وانت من دنيا عيالك ماخذك مـر الرحيـل
يا محمد هاك علمي واحفظه قبـل المـراح=انتبه لاخوانـك وبالـك عليهـم لا تعيـل
والله .. الله فالصلاة وفالصيام وفالصـلاح=والله الله فأمكـم والله لكـم بعـدي كفيـل
غمّض عيونه ونفسـه تطلـب الله السمـاح=رافـع ٍ سبابتـه مظـلـوم والله الوكـيـل
سل سيّاف الصفا سيفه ودقـه ثـم طـاح=رأس سلطان المراجل وانتثر دمـه يسيـل
غسلوه وكفنوه وفاح طيـب السـدر فـاح=وبالمصادف صار قبره جنب قبر ابن العقيل
يا فلاح الكارثه ما هي سوالف يـا فـلاح=خلني ساكت ودوّر غيـر هالقصـه بديـل
رحم الله الاثنان واسكنهما فسيح جناته وعفا اللهم عنهما
« آخـــر الـــمـــشـــاركــــات »
30-Apr-2006, 04:43 PM
قصه محزنه مع أبياتها
العرض العادي
