قصيدة لشاعر غلاب بن فارع المورقي

[ع المورقي]

كريم يابرق سمر في سحابه=برق من القبله يعرقب تعقراب
ذكر على القلب المشقا عذابه=وقعدت أخيل البرق لين القمر غاب
الصيف يامبارك تهشم ربابه=وصدق هماليله مثل عام صباب
لاوآهني ياصاحبي من مشابه=مشى مع البران في خضر الأعشاب
مشى بنجد اللي وسيع جنابه=وأسج من بين الجماعه والأصحاب
والله يالولا جرتي للربابه=أبردبها عن خاطري كل ملهاب
أزريت أكن الصبر من حر مابه=وقعدت أجر القوس وأجيب ماجاب
يامن يودي خطي مع جوابه=ويجيبلي منهم مراسيل وكتاب
سلم على ربعي وخص القرابه=على بني عمي عريبين الأنساب
واختص ابو مطلق برد الاجابه=واختصلي ربعي على الطيب دراب
وسلم على راجح قوي الحزابه=اللي على نطح المواجيب ماهاب
مثل القداح اللي عذي شرابه=يلذ مشروبه على كل شراب
ونايف ولد عود(ن) يعشي الذيابه=وإن جاء نهار(ن) فيه طالب وطلاب
زبن الدخيل إلى زحم والتوابه=هاذي عوايدهم يكفون الأنشاب
نايف عن الضيفان ماصك بابه=ولاهو معودهم على صكت الباب
وخاتم لحيث الطيبة تنهقابه=الله يفكه من صواديف الأسباب
ولد مبارك عزوة اللي اعتزابه=والا الضعيف ماحسبنا له حساب
ربعي هل العادات في كل بابه=عوق الحريب مفلجة كل طلاب
عزي بعزتهم بليا مهابه=والبيت مايرفع بلا عمد وأطناب
وإختامها ربي طلبنا ثوابه=يدمح لنا زلاتنا رب الأرباب
وصلوا على سيد البشر والصحابه=عداد هملول من الوسم سكاب

وسـلامتــــكم