قصيدة الطير كاملة لشاعرها محمد طلال بدر العتيبي .

[يوسف خالد]

السلام عليكم


قصيدة الطير للشاعر الشاب : محمد طلال بدر العتيبي .




الا يا نديمي فز والطير وقته حان
على قاع (لينا) بالعزم دقت الساعه
معي غن بالمنكوس وازهل لي السكان
شرينا ثمان كروز وفالدرج ولاعه
تفقد معاميلك وحرص على الرسلان
نبي فرجةٍ منها المطافيق مرتاعه
ولا تشري الا ماتوُرد من الخولان
وحذرا تكاسر سعرها عند بياعه
وما ينقصك لا تستحي قل ترانا اخوان
لعينك عصيٌات المقادير مطواعه
ولالي بها منه وربي هو المنان
هذا حق من له حط في قلبي اوداعه
على زادك وشربك قم اكرب على الطليان
على الصيد كلٍ في السحر صفط اشراعه
لعينا العديم اللي اعتلا تكية النيسان
عقب طول مقياضه معشٌاه بذراعه
ليا من كشفنا برقعه عن نظر شفقان
يشادي سنود اسكود لاهم بـ اقلاعه
ليا كوبرت واستعدلت تعتلي الجيٌان
فراها القطامي من مخاليب بتٌاعه
ليا صوبه فالجو ريشه غدا دمٌان
يخالط فضاه اقتام قوة تهيزاعه
ونصيحة فطين القلب سيقت بدون اثمان
معي لو سمحت شوي ركز ربع ساعه
تواضع لوجه الله ولا تنهر الجيعان
وتم الفروض الخمس واكمل له الطاعه
ولا ناحت الجيران ولا تنتحي الجيران
تصبر ترا الاجواد للطيب طماعه
ولا اوحيت من بنك الجمايل صهيل احصان
ليا من برز بالصاع دبٌل على صاعه
تجنٌب من المقرود وانته ترا الكسبان
على من يذم اللي سرى يقفل اسماعه
حذاري تبوح السر للكاذب الخوان
يصونه طوال الليل وليا سرح ذاعه
انا اللي حداه الوقت من بدٌة العربان
ظروفي تعلق له على راس شماعه
ولا كل من غنا له المستمع طربان
وانا سلعتي من غالي السوق منباعه
سبحت البحر والجذب لولوه والمرجان
خيالي على حد الشفق زين مطلاعه
انا اسبح سوات الحوت واكفح مثل حوران
مايذبح قواه الجو لا هب ذعذاعه
شربت المحيط الاطلسي عادني عطشان
كليت الجبال وهاجسي ماآشبع اجياعه
فلا كل من صدره شمالي وسيع بطان
ياكم من ضحوكٍ فالقسا شانت اطباعه
ولا كل صايب فالنوايا طليق لسان
ياكم من ضليمٍ مايعبر عن اوضاعه
وطول المجامل لزم يثر على الانسان
لزوم الرفيق ان ضاق يكشف عن اقناعه
ومن يستمع ماهوب من شاف بالاعيان
ولا تتبع اللي للدنافيس تباعه
تجارب حياتي للنصايح عطت برهان
ولا يبخص الصكات من قلة اوجاعه
صدوف الليال وفقرها ماهلكت سرحان
يجابه عذاب الوقت ويخاشر اسباعه
عسى الله يثبتني على الطيب والايمان
كفانا من الدنيا بكا صطوة الراعه
وباسي وراسي قاسيٍ مابعد قد لان
ولو لان جزٌيته من السيف من قاعه

[محمد الذيابـــي]

صح لساااااااااااانه

التوقيع

التوقيع محمد الذيابـــي