يا موتري - الهيـــــــــــــلا *** منتدى قبيلة عتيبة

أبو زيد · 15-Aug-2005, 11:46 PM

هذه الأبيات قلتها بعد رحلتي أنا وولد خالي منصور من الدمام إلى الطائف وكانت على متن موتري الأحمر "كرسيده جي اكس إل " ... كنت أحسب ان موتري ما بعده موتر... السرعه زايده والمكيف شغال ... وحنا ياغافل لك الله... شوي لا والله الا موتري يحنّ حنين... أعاين لا والله ألا الحرارة متعديه الشريط الأحمر... وأنا أهدي ويوم هديت وقبل لأسفط طفى الموتر... المهم سرى علينا يوم الله لايعيده... الجدير بالذكر إن ولد خالي جاي معي يبى خوتي وألا هو عنده تذكرة درجة أولى من عمله اللي هو فيه... ويوم درى إني رايح خاواني... وكان يزكّن علي من موتري قبل لا نمشي وأنا أقول أبد ارقد وآمن... سهود وامهود ... قال ان كان موترك مايتحمل ترى "الفرت" عندي جاهز وجديد وكلش... قلت أفا عليك هذي "كرسيده" "مو حي الله" على ما قالوا ... وصار اللي صار والحمد لله... وقلت على ساقتها الأبيات التالية:-

ياموتري

ياموتري ياللي جلست أتحراك ### موتر حمر قالوا عنه كرّ "سيــده"
علّم عن اللي بخاطرك أترجاك ### زعـلان وألا عـاشـق(ن) للشـريده
وش فيك يا قلبي عسى الشر ماجاك ### اصـبر أنا طـالبـك والله مـا أعـيـده
ياموتري يازين يازين ممشاك ### مع خوة اللي له اصفاتٍ حميده
خوة ولد خالي معه زان ممشاك ### لا تـفـضـحن ياموتري بالنـقـيده
منصور علمني عسى الشر يخطاك ### واش فيه هالموتر مـقـيـّد بـقـيده
مدري علامه افحصه أترجاك ### هـذي حـراره زايـده مستزيده
قال انتبه لاعاد موترك يبلاك ### ترى بتاخذ به مقـالـب عـديده
موتر كما موترك لعطيت ما أعطاك ### أهـل الوجـيه "المطرقه" هـم مـيده
مصنّع اليابان خربان لاجاك ### مـجـمّـعـيـنه فالبلاد البعيده
أنصحك تشري لك إذا الواحد أعطاك ### موتر شبح والا ترى "الفرت" صـيده
قلت السموحة يا رفيقي إذا جاك ### مني كـلام(ن) موزنن في قصيده
منصور موتر صاحبك لا عدمناك ### يشره ترى حساس ماهو حـديده
منصور يا خالي أنا أرجاك أرجاك ### تجبر بـخاطر موتري يا فـقـيده
منصور يا منصور لا حلّ طرياك ### يفزّ لك قلبي بـهـقـوة فـريده
منصور تكفى تسترح أترجاك ### وتشرب كبتشينو وتقرا جريده
وبختامها لك يا سند من تنصاك ### أطلب عساها رحلة(ن) لك سعيده

وسلامتكم
أبو زيد