تركي 2000 وعلي العضياني

[ابو فايح]

***الأربعاء الماضي إلتقى تركي 2000 وعلي العضياني وابن عتقان وفهد العازمي في الطائف

***دار بين علي العضياني وتركي 2000 طاروق يعتبر طاروق الحفل

***طاروق أبدع فيه العضياني إبداع لايوصف في رسم المعنى وتركيبه وكيفيه الدخول فيه

***طاروق دار معناه عن ( قروب تركي 2000 ) ومحاولة العوده لمنبع الشعر الطائف والتواجد في حفلاتها بدأيتا بإفتتاح مكتب الشهر الماضي

***علي العضياني يوضح أن الفرصه لكسب جماهيرية الطائف انتهت
وحصل عليها نور وزيايه هههههه وأيضا تخلل الطاروق بعض الأبيات حول شاعريتهما


***رغم خبرة تركي 2000 إلا أني لاحظت أنه لا يتعمق في أبيات العضياني كثيرا ويركز على شطر وينسى الأخر
والدليل(بيت روتانا الخليجيه و بيت القمريه ) وكيف رده عليهما .

علي العضياني

على السلم الرفيع اللي يعز الرأس وينشميه = هلا يا مرحبا في ديرة الشعر الحقيقيه
منول تركي الألفين غايب لو حضر طاريه = ولا يدري حقوق الطبع محفوظه وحصريه

تركي 2000

يدوم لك البقا والبيت ما يصعب على بانيه = وهاذي ديرت(ن) تعرف من ديار السعوديه
ليا منا بغانا دار قوم (ن) ناصله ونجيه = وأنا عيني تدل الدرب والرخصه عموميه

علي العضياني

ترى الفرصه ليا فاتت على الرجال ما يمديه = يا كبر الفرق بين الدار هاذي وهذيه
ليا إنه صار لك نيه تشيل الضلع وتوطيه = تغير فالبلد ملامح الأرض الطبيعيه

تركي 2000

يقولون الرجال الحي لا جاء ما قف(ن) يحييه = ومن يذبح عيال الداب بكره يذبح الحيه
أشوفك يالعضياني وصوتك لاتصيح أوحيه = إخذها بينه متعينه ماهي بمخفيه

علي العضياني

تغرك هقوتك ياللي تقول العلم ما تحميه = وأنا من خلقتي ماقد خانتني هقاويه
عسى ربي يعز اللي يسل السيف ويحنيه = على وضح النقا والقوم خياله ورجليه

تركي 2000

عسى ربي يعينك جاك شي منت متهقويه = تعاند تاجر التجار وأنت من الشريطيه
كشفنا الخطه اللي كان راسمها فريق بليه = وشكلنا فريق(ن) ينتصر ميتين بالميه

علي العضياني

يا تركي ما تعرف الصقر يوم إنك تبا تشويه = بعد ما لمعت صورتك روتانا الخليجيه
ترى هذا الزمن موسم محمد نور وزيايه = فريق(ن) كلهم في ساعة اللعب إنتحاريه

تركي 2000

أعرف الطير أبو جنحان من رأسه ليا رجليه = ليا حميت عليه الشمس دور بارد الفيه
لو أسجلك من ضمن الفريق وعضو في ناديه = نكبته نكبت(ن) تنشر فالأخبار الرياضيه

علي العضياني

تعرف الطير من رأسه ومخلابه يبا يدميه = بعد حلق وحام وشاف له فالأرض قمريه
فريقك يالمطيري بالهزايم فيه ما يكفيه = مدام إنك مديره كيف الأوضاع الإداريه

تركي 2000

حرام(ن) من حزامي لو يسام بقرش ما نشريه = وألا يا كثرهم حلياه في جو النعيريه
غناة الأمي يا صاحبي بين البشر تغنيه = لكن إفتح حسابك فالبنوك الإقتصاديه

الفيديو هنا

[ولدعساف]

ياسلام ياسلام ..

لله در الشاعر المبدع علي العضياني ولايهون الشاعر المبدع تركي الميزاني .. وصحة ألسنتهم وقلوبهم ..

ولله درك يابو فايح والكلمات تعجز عن ايفاء حقك لما تقوم به من جهد في الافسام الأدبيه بشكل خاص وبقية الاقسام بشكل عام ..

محبك ومغليك ..

التوقيع

قال أبوبكر الصديق - رضي الله عنه - ( الموت أهون مما بعده، و أشدّ مما قبله ) حسبي الله ونعم الوكيل كتبت وقد أيقنت يوم كتابتي .. بأن يدي تفنى ويبقى كتابها فإن كتبت خيراً ستجزى بمثله .. وإن كتبت شرا عليها حسابها

[فهد الزهراني]

احلى طاروق نسمعه قبل ما ننام

تسلم يابوفايح
دائما مميز

بطرحك
وبأخبارك الرائعة عن المحاورات

عموما الطاروق رائع وابوفلاح الظاهر دخل مرحلة الاحتراف وماشاء الله ثقته في نفسه كبيرة

بس عسى ما يكون احترافه على حساب المنتدى فنحن لازلنا في شوق له ولطواريقه هنا

وياليت يتبنى ادخال عدد كبير من الشعراء المميزين الشباب هنا

فهم يستحقون الاشادة بدلا من كثير من اشباه الشعراء اللي ملينا قصائدهم وطواريقهم

تحياتي لك يابوفايح

[محمد ابن رووق]

محاوره


لو لم تذكر اسماء الشعار كان الناس كلها اتفقت على ان الأول هو المتفوق



علي العضياني يسير نحو القمه بثبات



تركي الميزاني أي أحد من شلته يحس إنه بدا يسحب الضو منه طلعه وجاب واحد بداله

[فوازالعتيبي]

القمريه


ههههههههههههههههههههههه


لاهنت يابوفايح

[ܓܨ عبدالله البرقاويܓܨ]

يا تركي ما تعرف الصقر يوم إنك تبا تشويه = بعد ما لمعت صورتك روتانا الخليجيه
ترى هذا الزمن موسم محمد نور وزيايه = فريق(ن) كلهم في ساعة اللعب إنتحاريه

انا اشهد انه ابدع ابو فلاح وارى انه الافضل في هذه المحاوره
صح لسانه مدد بلاعدد
وشكرا الف ياابو فايح مبدع دائما

[مرزوق حمدان العتيبي]

..

.

محاوره رائعه بكل المقاييس بين الشاعرين ..
..
والله لايضركــ يابو فلاح اهنيكـ من قلب مخلص على هذا التوهج
والمستوى المذهل تبارك الله..

اما انت يابو فايح فمهما شكرتك لن اوفيك حقكــ..
..

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[الحد الرهيف]

ياسلام عليك يابوفايح

عرفت تختار فعلا

محاوره من الذوق الرفيع

والعضياني متفوق بلاشك وشاعر معني حقيقي

[محمد العتيبي]

ابيض وجه يابو فايح ..

التوقيع

للتواصل عبر twitter تويتر al_bargawy@

[تركي العصيمي]

مدام إنك مديره كيف الأوضاع الإداريـه

ههههههههه حلوووووووووه

تسلم يابوفلاح

ابو فايح انت روح المنتدى