ديوان الشاعر محمد بن جفين العرم

[سلمان العرم]

بسم الله الرحمن الرحيم

السلام عليكم ورحمة الله وبركاته

اليكم ديوان الشاعر الكبير محمد بن جفين العرم الشيباني ,

وهذا الديوان عبارة عن بعض قصائد الشاعر العديدة وهاذا ماستطعت جمعه

واتمنى اني قد وفقت في جمعهاء


ركعتين الفجر

ياصاح لاتشتكي لـي ضيقـةٍ فالصميـم

أنا أدري إن بك بلا مأنت بعلى مايـراام

والله لتبطي وصدرك فيه غيـضٍ كظيـم

إلين تدّي فروضـك بالوفـاء والتمـام!

العقـل يالآدمـي لاراح تصبـح بهيـم

تمشي سواة البهيمه ماتعـرف الكـلام

ومن حلّ في واديٍ فيه الهيـام بـيهيـم

ومن جالس أهل الظلال إقر عليه السلام!!

عمرك سمعت بـصِراط الخالق المستقيم؟

اللي منه شاب رأس اللي بسنّ الفطـام؟

هذاك مايهتدي لـه غيـر قلـبٍ سليـم

واللي من أهل الظلاله يقذفـه فالزحـام؟

هو أنت ياصاحبي ماتـدري إن الجحيـم

وقُودُها الناس وأكوام الحِجاره طعـام؟!

لاضاق صدرك تعوّذ من بليـس الرجيـم

وقم صلّ لك ركعتين وتنبسـط ياغُـلام!


إسأل مُجرّب ولا تسـأل طبيـب وحكيـم

خصٍّ بعد ركعتين الفجر خلف الإمـام!!

والله..والله..ثــم والله ربٍ عـظـيـم


إن السعاده على تارك صلاته حـرااام!!!


عندي شهادة


كنت أفكّر كيف أسوّي لـي جدايـد
والشعر من فيض ولاّ من سعـاده

وفالقصيبي مانويت أكتب قصايـد
مأكرهه..بس المواطن ويش فاده؟؟

ويش تنفعـه المدايـح فالجرايـد
يوم كل(ن)بالقلم يرعـف مـداده!!

الله إنّه يرحمـه لـو كـان نايـد
ويرحم كل اللي توفو مـن عبـاده

لابغيت أمدح مدحت أهـل العوايـد
الملوك أهـل المكـارم والسيـاده

عاد عيد اللي على شعبـه يعايـد
وكل عام يعايـد الشعـب بزيـاده

فالرخـا ولاّ فـالأيـام الشـدايـد
المكارم من طويـل العمـر عـاده

بحر جوده دايم(ن)للشّعـب جايـد
لو يجـوع الشعـب مايهنـاه زاده

دمت ياصقر العروبه وأنـت قايـد
وقبل لأختمها..بقى عندي شهاده؟

يأبو متعب حب شعبك فـي تزايـد
قبـل تتفضّـل عليهـم بالزيـاده!

الشــــــــــعر فالمزاد


غصّت الساحه وكل(ن)قام يثعـى فالقصيـد

بين ودّ وبين هات وبين حِط وبين شيـل!!

واحد(ن)يفراه من سرّه ليـا حبـل الوريـد

واحد(ن)يفراه مع جنبه مثل فري الصميل]

وإن نشدته قال أنا فالشعر مثل إبـن الوليـد

والحقيقه يبعد عن الشعر بعده عن سهيـل!!

الشعر مظلوم يأهل المعرفـه ظلم(ن)شديـد

المسمى شِعر والمضمـون ماتلقـى دليـل!!

فيه(حُر)وفيه(مر)وفيه(طِلق)وفـيـه(قـيـد)

وفيه(بيع)وفيه(سرق)وفيه(عدِل)وفيه(ميل)!!!

كيف صار الشعر يشرى فالمزاد مع الحديـد

وتُكتب الأبيات بإسم المشتري والله وكيل؟!!

ناس(ن)تبيّع مشاعرها تبـي كثـر الرصيـد

ياخساره وين راحت هيبة الشعر الأصيـل؟؟

إزجروهم وإدحروهم يأهـل الـرأي السديـد

إفزعوا للشعر لاينهان ثـم يصبـح ذليـل!!

صار(زيد)يثبّتـه ل(عبيد)ويشوته(عبـيـد)

والثنينه مايعرفون السمين مـن الهزيـل!!!

(التوارد فالخواطـر) صاير(ن)عـذر البليـد

كلمتين(ن)فآخر الموظوع يكتبها(الزميـل)!!

كنت أكذّب كل مأسمع لاحشى ماهوب أكيـد

وبعد(شوف العين)..هل باقي بعد هذا دليل؟؟!


فلان...وعلّان


إليـا مدحـت فلان..زعّلـت عـلاّن

وأنا أدري إن علاّن ماله علاقـه؟!!


وش مزعلٍ علاّن من مدحَـت فـلان

صحيـح لاقالـو حماقه..حماقـه!!


رجلٍ يغيضه مـدح ذربيـن الأيمـان

أنا أشهد إنّه يارياجيل...........؟!!!


ورجلٍ يحاول يخفي النـور جابـان

ولابينـه وبيـن المراجـل وثاقـه!!


الفعل ماينسى علـى مـرْ الأزمـان

لو هو علـى الرديـان مـرٍّ مذاقـه


يوم إنّها بالرمح والسيـف شامـان

فـي وقتهـا تقاسموهـا الرفاقـه!!


واليوم كـلٍ عنـده البيـت مليـان

والفِرش مخمل والمخـدّه إرقاقـه!!!


من فضل ربّي عايشٍ بأمـن وآمـان

وكلٍ من الصرّاف عنـده بطاقـه!!!


فـالجاونـي دخّان..والعـود دخّـان

وكلٍ تميَّز ريحتـه مـن نِشاقـه؟!!


ولاكل مـن يحمل(لقب)مثل(سلمـان)

ولا كل من يبرك له لحمل طاقـه؟!!


ولاكل من سِمّي على الذيب..سِرِحان

ولاكـل مُتحـدّث يجيـد اللّبـاقـه؟


ولاكل من صارحك بأخطاك عـدوان

ولاكل من يضحك بوجهك صداقـه!!!


وليا بحلت بشي وأصبحت عمسـان

من مشتل(عبيد الرشيد)إخـذ باقـه؟


(إضرب على الكايد لياصرت بحلان)

وعلى الولي وصل الحبل وإنفتاقه!!!!


....أنا أفهمها وهي طايره؟؟



ما والله أقبل عذارك ياعديم الضمير

يكفيني أعذار..أنا أفهمها وهي طايره!!

ياما غفرنا من الزلاّت شئً كثير

وقلت إلك عااادي..وأنا بي حسرةٍ جايره!!

وياما تحاليت لعيونك لهيب السعير

وخفّيت عنك بعيوني دمعةٍ حايره؟

وياما تحمّلت من شانك طويل المسير

وأنا أحسب أوضاعي بدرب السعد سايره!!

خلاااص..لاتعتذر خلااص لاتستشير

لاترجع تقول ماصارت وهي صايره؟

لاتحسبنّي(كفيف)أنا تراني(بصير)

تبغاني أدخل معك في داخل الدايره؟؟

مافيك شيمه ولا قيمه ولافيك خير

ومن الوفاء مابقى بحزامك الثايره!!!

ماعاد أواطنك طير إن كان تقدر تطير

مأحدٍ بجابرني أشري سلعةٍ بايره؟!

لاكِرّر العلم تفهم منه حتى(.....)

وألا أنت مأنته بفاهمها وهي طايره!!!!



معانأة مستثمر


يابري حالي يالبناخي من السوق
حالي ليا أحمر المؤشر حرقها!!
أناظر الشاشه وأنا تقل مخنوق
ولانسبت وحده تحت قلت(ذقها)!!
وحول عليك أبو الهوامير من فوق
وصفقك في وضح النهار وصفقها!!
ويوم إنَك من الصفقه تفيق وتفوق
إليا (مفاتيح التبن) في حلقها!!
تؤخذ فلوسك قدم عينك بصندوق
لو كان سرقه كان قلنا سرقها!!
وأنته تردد(كل مطرود ملحوق)
وعمك حفت رجله وهو مالحقها!!
هذي حقيقه وأنت تبغاني أروق
واللي خلق كل النفوس ورزقها
أخاف يقفل معي فالقلب معلوق
وسفينة الأحلام يأتي غرقها؟!!
الله يجيرك يالبناخي من العوق
قلهاك كل اللي بقى لك وسقها)!!!
معاد لي في داخل السوق مسيوق
و(المحفضه)ياخالد أحرق ورقها!!!!
لو مأسكن ألا خيمة(ن)كلها فتوق
معاد أبا(الفله)ولأبغى شققها!!!!!!!


المجامله..نفاااق


ياصديق المصلحه وينـك و ويـن الأُصـول

الأُصول اليوم راحـت هبـا بيـن الرِفـاق!!

الأُصول اليوم راحت مصالح عَـرض طـول

شفت كيف أصبحت عندي صديق بلا وفـاق؟

والصداقه راحت اليوم شـوت وهـات قـول

ولو تشرِّع طاقتك..شفـت شـئً مايطـاق!!

إتصال..ودعوه..وعـودٍ أزرق..ومعَـمـول

ودَهن سير..وحب خشم..وسواليف..وعِناق!!

ولا بغى له حاجةٍ منـك جـا يمّـك خجـول

ولا خذاهـا منك..ماترجـع إلاّ بالطِـقـاق!!

وكان مأدرك حاجته..قام من عنـدك عجـول

وقام يلعن فـي صداقتك..وأحرقها..حـراق!

وإن حلفـت وقلـت والله..يكـذّب ماتقـول

وأنت مأنت مصدّقه لين يحلـف بالطـلاق!!

وينك أنت و وين أُصول الصحابه والرسـول

كلّكـم ياطيـر شلـوى صداقتكم..نفـاااق!!!

الصّراحـه طبعـي اللـي بـأزول ولايـزول

وقل لكل الأصدقاء:يفحصـون الair bag!!

لاتجامل مع صديقـك علـى قـرع الطبـول

قلّه إني هكذا..وإتركـه لـو كـان ضـاق!!

وفالنهايـه ياصديقـي قـل محمـد يقـول:

(المجامل فالتعامل..من أنـواع النفـاااق)!!!


شــــــــــاشة إنترنت


يابنـت كـل الكـلام اللـي تقوليـنـه

مبطـي نسيتـه بسياتـه وحسنـاتـه

يوم الهواء حلو أخذنـا فـي ميادينـه

ذقنـا حلاتـه وذقنـا أحيـان مرَاتـه

يوم الهـواء تنعشـك شمَـة رياحينـه

مـا والله أحـلا مواعيـده وصدفاتـه

يوم الهواء تغـري العاشـق بساتينـه

كـل العشاشيـق تحلـم فـي ملذَاتـه

واليوم في(شاشـة إنتـر نت)معنينـه

كل(ن)على شاشتـه يشـرح معانأتـه!

والمشكله كل(ن)يقـول الوفـا وينـه؟

وبنات حواء عن آخرهن صديقاتـه!!!

صارت مواضيعهم لبنـه علـى طينـه

والكل صار الغرام أسبـاب ماسأتـه!!

يابنت أنا صرت عكس اللـي تضنينـه

عفت الهـواء والغـرام وكـل أداواتـه

ماعاد أريد الهواء زينـه علـى شينـه

ملَيـت مـن قول(أحبك)والتنهَـاتـه!!

والله مأعـرف الغـرام اللـي تقولينـه

من يوم شِفتك وأنا(لِزم العمى شاته)!!!!


محبة مواسم


الــحـــب مــايــأتــي كــــــذا يـــأبـــو جـــاســـم
مـايـنــوخــذ بــالــكــمْ نــبــغــاه بـالــكــيــف؟!
هــــــــاذي نـسـمّـيـهـا..(مـحـبّـة مــــواســـــم)
يـحـبّـهـا فالـصـيـف..وتـروح فـالـصـيــف!!
لا فــــيــــه لا رابــــــــط ولا فــــيــــه قــــاســـــم
ولا لـــــه قـوانــيــنٍ ولا فـــيـــه تـصـنــيــف!!
تــــقــــول واحــــدهــــم مُــــديــــر الـــمـــراســـم
اللي يجيب الضيـف ويـودّع الضيـف!!!!
لا مـاوقــفــنــا مــــوقــــفٍ مــــنــــه حــــاســــم
راح الــهــواء لــعــب بـيـديــن الـمـلاقـيـف!!
حـــــــب الــنـــقـــا مـايـنــكــتــب بــالــمــراســم
(ينحت)علـى عـوج الحنـايـا المهـاديـف!!
حــــبٍ مــــن أسـبـابــه تـضـيــق الـمـنـاســم
حـتــى يـعــدّي بــــك طــــوال الـمـشـاريـف!!
مـاهــوب حـــب أحــمــد وســامــي وبــاســم
اللي على(الماسنجر)يحذف ويضيف!!!!
هــــاذي مـحــبّــة يــأبـــو جــاســـم مــواســـم
يحبـهـا بالـصـيـف وتـــروح بالـصـيـف!!!!


..إحتراماً للزماله..كما كُنت!!


كـلــمــتــك مــرّتـــنـــي ولاحـمّـســتــنــي
تـيـاسـرت عـنّــي وعـنـهـا تـيـامـنـت!
لاتحِسـب إنِهـا يالحبيـب أحرجتـنـي
لاكنّها كانت..ولاكنت حتـى أنـت!!
لامنّـهـا مــن عـنــد شـــرواك جـتـنـي
وعرفت مغزاها..عن الرد هوّنـت؟!!
تــمـــرْ سَـمــعــي كـنّــهــا مـاعـنـتـنــي
ولاقطْ يوم لشرهة الخايب أذعنت!!
والشـرهـه مـــن الـطـيّـب ليانصـتـنـي
فـزّيــت مـعـهـا وإعـتـزيـت وتبـيّـنـت؟
وأن كنت مخطي والحقوق ركبتنـي
بـركــت لـحـقـوق النـشـامـا وثـمّـنــت
وأن كـان شرهـة صاحبـي ظالمتنـي
شرحت له كـل التفاصيـل وأعلنـت!
أنـــــا مـنــاقــب ســيــرتــي رافـعـتــنــي
وأن كـان راحـت للبراهيـن برهنـت؟!
ومــــع الـنـشـامـا عــزّتـــي مـكّـنـتـنـي
ولاّ أنتـه إتمسكنـت حتـى تمكّنـت!!
عـنـدي علوم..وسـيـرتـك ماخفـتـنـي
بس إحتراماً للزّماله..كمـا كنـت!!!


((انواع الدموع))


لبّيه ياللي حكيك أحلا ماسمعت من الحكاء
ياللي ليامنّك حكيت أصير لك كلّي إسموع!
السمع لك وحدك ولالك فيه يالترِف شركاء
سكّرت سمعي عن سوا حكيك وجيت بكل طوع!
لبّى نفَسك اللي يذكّرني بريح المستكاء
وفديت أنا ضحكاتك وهمسك على ضو الشموع!
أبا أشتكي حالي على حالك ومنك المشتكاء
وقولي لحالك يرأف بحالي ترى حالي جزوع!!
لو إن حالي ماجزع من فعل حالك ماشكاء
لكن حالي حالته حاله ويشكي من إسبوع!!
ماشفت دمعه يوم حوّل فوق خدّه وش حكاء؟
ساعة لقانا يوم أنا ويّاك في عصر الربوع؟!!
أبا أسألك كانك نبيه وفيك شي من الذّكاء
وأبي الإجابه..هالدموع اللي تشوف من أي نوع؟؟!!
معروف في عزّ الحزن دايم لابد من البكاء
لكنّ في عزّ الفرح ويش اللي يجيب الدموع؟؟؟؟!!

آخر تعديل سلمان العرم يوم 07-Jan-2011 في 12:21 AM.

[المـرشدي]

صح لسان محمد بن جفين

واشكرك ياسلمان على الموضوع الجميل

تقبل مروري المرشدي

[سلمان العرم]

شكرا يالمرشدي على مرورك تحيتي لك

[سلمان العرم]

ارجو من المختصين تثبيت الديوان في قسم دياوين شعراء قبيلة عتيبه

[رايد الفضاء]

صح السان الشاعر محمد العرم والاهنت ياسلمان