ســــــامح الله من قصدني واعتمدنـي بالخطيـه

[ســيــف العـــرب]

السلام عليكم ورحمة الله وبركاته

أسعد الله مسائكم وصباحكم بكل خير

هذه القصيدة للشاعرالرااائع حبيب العازمي العتيبي


ســــــامح الله من قصدني واعتمدنـي بالخطيـه
من قريبين الجدود ومن بعيديـن الجـدودي

دايـمٍ مــــــــــــايفلـح اللـي غيّـر النيـه بنـيـه
والخطيه كان ماتنقص تراهــــــــا ماتـزودي

خابر انك مـــــــــاتـروح بعيـد يـاراع الرديـه
لو مشيت الفين كيلو ماتعديت الحـدودي

انـت طرقـيٍ معنّـى لاشــــــداد ولا مـــــــطيـه
لا انت فتال العقود ولا انت حلال العقـودي

لو تحّزم بالرصـــــــــــاص ولـو نقلـت البندقيـه
الرصاص يذل والبندق تذل مع الشــرودي

هبّ وانا راعـي العشـــــــــوا وخيّـال العبيـه
كيف يارخو العضود تضد مفتول العضودي

والله انـي لا كليـل ولاذليـل ولاعـــــــلـيـه
مير احسب لي علومٍ مابقي منهـا وجـودي

احسب حســـــاب الرفاقـه والمـروه والحميـه
حشمة للطيبين اللـي بعضهـــــم فاللحـودي

نظرتي فالطيبيـن ونظـرة الحســـــــــــــاد فيـه
كلها نظرة حسد والعود في عين الحسـودي

والله اني ما ادعيـت بحجّــــــةٍ ماهيـب ليـه
حجتي ما تنجحد واللي جحدها من شهـودي

خافوا الله يالقضــــــاه اللـي تعرفـون القضيـه
الصحيح يسود والباطل مصيره مايسـودي

لامطـــــــــالبكـم بديـن وذمتـي منكـم بـريـه
مابقي غير العلوم اللـي يبيحـن السـدودي

بيّنٍ عيد رمضـــــــــــان وبيّـنٍ عيـد الضحيـه
ياعسى الاول يعود وياعسى الثاني يعـودي

ياقطن جاتك مزوّعـــــــةٍ مـن الحـرّه طميـه
مستخفّه عقب كانت لارمـوح ولاهبـودي

ساقها عشق الجنـون وساعدتهـا الجاذبيـه
لين عدتها الجبـال المستطيلـه والنفـودي

معجزه في عصرنا الحـــــاضر وعصر الجاهليه
الهوى صاب الحجر مابه قلوب ولا كبـودي

وين قيس بن الملوح وين ليلـى العــــــامريـه
كيف ماينصفهم اللي ينصف ديانـا ودودي

والعزا فيما بقى واللـي بقــــــــــــا فيـه البقيـه
مرة الايام بيـض ومـرت الايـام سـودي

يالله اجعـل خاتمتنـا بالسـلام وبالتحـيـه
ونتوفى محرمين وفي حرم ربـي سجـودي