من اقوى الطواريق بين حبيب والقرقاح

[المثالي]

فلاح القرقاح


سلامي سلام ٍ يتجه للكبير وللصغير
في حفل ابلج ٍ من كبر قدره كبير ٍ مجلسه
تعبك وتعبنا يا حبيب قليل ٍ من كثير
وعرف النشاما فايده والتجارب مدرسه



حبيب العازمي



هلا مرحبا ترحيبة ٍ كلها من باب خير
وتفصل على القرقاح ثوب ٍ طويل ويلبسه
دروب المراجل كايده وانته مسير تسير
ومال ٍ بلا راعي ترا الذيب الاشهب يفرسه



القرقاح



توكل على الله وانتبه للرحا اللي يستدير
ترا صاحبك يسري بك الليل والله يحرسه
يقول المثل يا بن الحلال اكل طير وخل طير
ترا كل رجال ٍ مجهز رصاص مسدسه



حبيب


ترا الارض كوره وانت فالارض ما تقدر تطير
ليا جبت بنك عند راع المناره يحمسه
ابى اكرم شناباتك واعشيك من كبد البعير
وابى اقلع ضريسات اللبن والضروس المسوسه


القرقاح



ترا اصغر شهاب من المجره عبوس ٍ قمطرير
لو يطيح فوق الضلع يا طير شلوى مسمسه
اقول الشجاعه عند مصعب وخالد والزبير
شجاعتك هاذي كلها وسوسه في وسوسه



حبيب



ليا طاح نجم من المجره ينجيك المنير
وقوم ٍ تضرت بالغنايم ما ترجع مفلسه
ترا ما انت بال الشيخ ولا السديس ولا للجبير
مطاعتك هاذي فاخر الوقت تخر هلوسه


القرقاح



الا يا عتيبه ويش تبغون بالشر الشرير
سلامي على الامر الكليف وعلى اللي سيسه
ترا ما انت بالمتنبي ولا زهير ولا جرير
قصيدك لو يوقع على العود الاخضر يبسه


حبيب


والا ياقحطان اللي تقولون غير النير نير
تراها الحصاه الراسيه والحصاه مقدسه
انا خابرك شاعر ومفتي ولا عندك ضمير
تبى لك جواهر في قراطيس بيض مقرطسه



القرقاح


الا يالسيوف اللي كسرنا بعضها فالجفير
عليكم غبينه ذكريات العهود المرمسه
لاتنشد طبيب الله يهون عليك انشد خبير
ترا حصة ٍ للفسحه وحصة ٍ للهندسه




حبيب



وصلك الحصان وراكبه واحد ٍ فارس خطير
وعمك تلوا فالعنان وشرد فوق فرسه
وحنا جعلنا الله نحدد لكم باقي المصير
بعد ثارت الهيجاء وشهب الوجيه معبسه




القرقاح



وصلنا البعير اللي من هياجه يكب الهدير
وزرقناه بالرمح المشجب ولا رد انفسه
فرضنا الزكاه اللي دفعها الغناوي والفقير
وراياتنا بالعز تطرخ ماهيب منكسه


حبيب




زرقت البعير وجاك كله وشرك مستطير
ولو كان حظك زين كان الجمل ما تلمسه
تزكي على قحطان صاعين من تمر ومضير
وحنا سوات الداب من ناش راسه يندسه