اسعد الله اوقاتكم بكل خير
تواصلا مع هذا القسم
نتمنى لها ان ترتقي لمستوى ذائقتكم
البارحه كني على خف وجناح =ساري على نور النجوم الرقيبه
واصيح للجوزاء والوّح بملواح =أضنها وسط السماء تلتهيبه
مبا يجي من عقبها نور الاصباح =نور الصبح من عقبها ويش ابيبه
ان شفتها بدلت الاحزان بفراح =لو هي بعيده في عيوني قريبه
مع نورها في ظلمة الليل لاضاح =اسري عليه بليل ماينسريبه
اقوم له لاقام واطيح لاطاح =واعوذ بالله من حياة الغليبه
يفتح قفل قلبي لحاله بمفتاح =ويدري بسرٍ فيه محدٍ دريبه
انا الجريح محطم ارقام الاجراح =الرقم الاول فالجروح العطيبه
اللي ّلونه فالسماء برقها لاح =والله لتالع فالغصون الرطيبه
مافاد في النصح من عند نصاح =سقت الجمل لين الجمل بان عيبه
انا احسب ان الحب لعبٍ بمسباح =ورسايلٍ بين الحبيب وحبيبه
وزهور ريحانٍ بها العطر فواح =يقطف ويهدى للبني ريح طيبه
ماكنت اعرف ان الهوى كنه سلاح =اما ظبته حط راسك ضريبه
ثم عاد رح عد الخساير والارباح =تفني كتيبه ماتبقي كتيبه
الحب ليل وعصمة الدين مصباح =واللي يضيع بظلمته يقتديبه
ولا ليالي وقتنا حيل ولقاح =ماودته لازم تروح وتجيبه
محدٍ من الدنيا سعيدٍ ومرتاح =الكل منها شال همه بجيبه
واللي مصبرني على كل ماراح =اني عتيبي واعتزي في عتيبه
من روس قومٍ مجدنا سيف ورماح =وانتي غريبه عندنا يالغريبه
اعيش حبك وانت سارق ومزاح =اللي سواتك جعل ربي حسيبه
ماعاد باقي للوفا عندك مراح=الذيب عن مافيه يكفي قنيبه
ليه التوجد عقب ماسدنا باح =كلٍ يروح ويكتب الله نصيبه
06-Jul-2010, 07:03 PM
لعب مسباح !!
العرض الشجري