قصيدة الكتفاء الشمري في قبيلة الروقة

[ابو محجن]

هذه القصيده تعتبر من مفاخر عتيبة واللي لروق لبرقا واللي لبرقا لروق و وهي هديه من الشيخ الشاعر/ عليق بن وبران بن مشرف الكتفاء الشمري : حائل أمارة العدوة

يقـول من عبر بزينات الأمــثال=وازهى القوافي جايبين جزيلـه
من جاش أديب ينظم الشعر بالحال=أخذ جزيل القاف وأرمى هزيلـه
الفكر يحضر والحبر بالورق سال=والقاف مازون على مابنيلــه
مــثايل ماولــفــوهن الأنذال=ولا نقلوهن مدركين الفـشيلـه
شاقن لنظم الشعر ماضين الأفـعال=يوم الزيارة للــديار الجميلـه
يوم الخميس اثنين وعشرين شوال=جينا الرجال اللي علومه نبيلـه
أولاد روق اللــي عريبين واثقال=قبيلــة ياحي والله قبيلـــه
أولاد روق اللي لهم صيت وأفعال=أهل السيوف المرهفات الصقيلـه
وأهل البيوت الراميه كنها الجـال=عــز الرفيق ومكرمين نزيلـه
ذباحـة الحايل كريمين الإســبال=متوارثين الطيب نعم القبيلــه
شرهاتهم ماهي على جمـعة المال=فوق الصحون يقلطون الجليلـه
كبار الصياني والسمن فوقها سـال=الابة اللي يذبحـون المحيلـه
وبيوتهم للضيف مزبن ومــدهال=وديارهم كــم واحد يلتجيلـه
ولو ننشد التاريخ ونشوف وش قال=يشهد لهم تاريخ نجد وجيلـه
تاريخهم واضح على راس ماطـال=تاريخهم بين وكل حكي لــه
يوم علـى طـلال مايبهج البــال=ثار الدخن من حر صلوا الفتيله
زادوا على الهقوات يوم أدبر الفال=يوم الحرايب والعدو تركي لـه
ميزانهم يرجــح على عايل عال=وحريبهم يوم اللقا عز تيلــه
قبيلـة ماطاوعوا قو عــــذال=قوم على الحراب تشفي غليلـه
رجالهم ينطح ثلاثين رجــــال=وخيالهم ينطح جموع وخيلــه
للزين زينين وللــــضد جهـال=عوق الخصيم ليا بدا منه ميلـه
قوم يعرفه عاقل الناس والضــال=سقم الحريب ومقحمين الدبيلـه
يشدون سيل يضرب الجال للجــال=واللي بوجه السيل لازم يشيلـه
ودخيلهم يلقى المعزة ماهــو ذال=وعز الله أنه داخل به دخيلــه
وصديقهم لا نشدته عن الحـــال=يقين مايعتاض عنهم بديلـــه
وصديقهم عنه المحاميل تنشــال=تنشال لو أن المحامل ثقيلــه
وعدوهم يسقونه المـــر وذلال=بالليل يســـهر ماتهنى بليلـه
وعدوهم يذوق تسعين غـــربال=خلوا على كبده حر ومليلـــه
وعدوهم لو هو من الجيش حمـال=بالمعركة خلوه يطرق شليلــه
يردون حياض الموت جسرين الأقبال=فرسان ليا ركبوا ظهور الأصيله
صولاتهم غدابها كم رجـــــال=وياويل رجال تعرض سبيلــه
وكم عقيد وسدوا راسه الجـــال=وشيوخ راحوا بالمعارك قتيلـه
ولو أبا اعد فعولهم مالـــها تال=يصعب علي اعدادها من حصيله
يستاهلون المدح عريبين الأنسال=نسل الرجال اللي علو بالطويلـه
شي لشوفه زاد مدحي بالاقـوال=والقول عقب الفعل أكبر دليلــه
وجعل الخيال اللي نشى فوقه خيال=والغيث يمطر من حقوق المخيله
على نفي مع القــرارة والاجبال=وتسيل كل شعابها من مسيلـه
حيث أنها ديار البطـوله والأبطال=ديار الكرم والطيب للي يجيلــه
ديار لهم حامينها ماض الاجيـال=من دونها ترخص عمار طويلـه
يقوله اللــــي ماتغير ولا زال=قول الحقيقه والصراحة يبيلــه
وصلاة ربي عد ما وادي ســال=وعد براق برق بالمخيلــــه
على الذي سن الفرايض والأعمال=نبينا المختار راعي الفضيلــه

اللهم صلي وسلم على سيدنا محمد