الونيس الوفي

[ابن سلوم الهيلوم]

ذ

ياليل انا الليله جليسك وشاعرك=وانت الونيس اللي ليا جيتك القاك

جل وتعالى اللي لخلقه مصخرك=تتلى النهار اللي ليا اقفيت يقفاك

يجي اخره باولك واوله باخرك =تقول ترقب جيته ويتحراك

ونا انتظر جيتك واجلس واسامرك=اشتاق لك واعشق سكونك ومسراك

تسمر مع شعوري وشعري مشاعرك=يوم اتحرى هجعة الناس واقراك

استغفرك يارب واحمدك واشكرك =يامن بتدبيره يدورن الافلاك

ويافكر عن ماضيك فضفض لحارك=واستر عيوبك عن محبيك وعداك

ولا كل من يضحك بوجهك ويشعرك=انه من اصحابك ومهتم برضاك

تفك له صدرك ويعرف سرايرك =وتقول لا يدرون ذولا وذولاك

ليا سمحت لسر صدرك يغادرك =بيغادر اصحابك مثل ماتعداك

ولا تنغرس زلة رفيقك بخاطرك=وتنزل ورا نيات قلبه نواياك

صبرك على الجاهل دليل لتطورك=ودليل اصالة منسب اصلك ومنشاك

هذا ونا ناصحك ماجيت احذرك =نصيحتة من قلب يغليك وعفاك

آخر تعديل ابن سلوم الهيلوم يوم 04-Jan-2012 في 04:20 PM.