قصيدة (( موتري ))

[عبدالله بن عوير الدعجاني]

(( وجــــهــــة نــــظــــر ))

موتري يوم استوى الخط لا تمشي عدال= خل ويلك يطوي البعد فالدرب الطويل
موتري دام النوايا على حدود الشمال = خلها يم الحديثة ولا عنها بديل
لاستوى مشيك مع الدرب يفتحلي مجال = واتخير من جزيل المعاني لك جزيل
واخذ مني صادق العهد بعهود الرجال = مانوقف لين يافي عميل (ن) من عميل
ماانقضت حاجاتنا عبر دورات الليال = كود في قو العزايم ودوس المستحيل
ذي وصية شايب (ن) ما تناسوه العيال = يومها في تالي الوقت يحفظها قليل
في زمان مضيع الود عشاق الريال =مرخص الغالي على الهون في رجوا الحصيل
مادفعت الرجل فالدرب في رجوا الهزال = لو احد الرجل تاطا على الحد الصقيل
والمعزة رأس مالي ولالي رأس مال = غيرها لو يقسي الوقت ويشح البخيل
موتري مالي على الصبر قوة واحتمال = أذبحت سود الليالي وانا عابر سبيل
لوعتني سود الأيام في صدق وخيال = مالقيت مع الحقيقة مبات ولا مقيل
جيت أعدلها مع الوقت عن درب الميال=شفتها مع قاسي الوقت في حالي تميل
غرني من كنت أظنه على عهدي يزال = بالقسى لين أنها شافت العين الدليل
مادريت إن الوفا فالزمن جرف (ن) هيال = لين زل بكل الأقدام وعيوني تخيل
طحت والهمة ثبات (ن) على روس الجبال =ماتهاوت فالزمن لو هوى رأس الذليل
شفت ما عفته وخليتها تمشي عدال = لو قضيت العمر كله وأنا عابر سبيل

لسماع القصيدة بصوت الشاعر اضغط هنا

عبدالله محمد بن عوير الدعجاني
(( أبو نواف ))