حروف الـــعزّ ...... ( مصافحه أولى )

[عالي الحوم]

السلاام عليكم

هذي أول مشاركه لي في هذا المنتدى الرائد وأتمنى أن تنال أعجابكم

يا نفس جودي باللي ودّك تجودين=سوقي حروف العز فيها مهابه
شكّلي احروفك بيوتٍ موازين=العبي المسحوب جرّي ربابه
و ان قسى حرفك وعيّا عن اللين=اشهري يا نفس سيف الكتابه
أجبري قلبٍ تكسّر بكسرين=كسر جاير وكسر أفقد صوابه
شفّي هم بدوٍ على الطيب رابين=طيبٍ يسوق الطيب يحيي هبابه
اللي بأنفسهم نوايف عزيزين=ما يهابون غير ربٍ نهابه
وينه اللي ناشدٍ ساسي من وين=سؤال مغرور ساقه حضرة جنابه
مطبوع في طبعه طبوع الرديين=عيبٍ علي أعيب والعيب عابه
منقود لو أشرهه عليه لو بحرفين=أشرهه على حظٍ لي اليوم جابه
دم البدو فيني سرى بالشرايين=فصيلته حيٍ وقلبي حيا به
ايه ابدويٍ .. تحسبنّك تعيبين؟=لا والله إلا فخري زاد أنتصابه
ان كان قصدك لأنطباعي تعرفين=عزّي تعلاّ كل حرفٍ رقى به
وان كان قصدك من طبوعي تشوفين=عزيز نفسٍ بالشدايد صلابه
وان كان قصدك من شموخي توطّين=عالي الحوم ما تحبله ذبابه
ربعي أنا تذكرهم بيد الميادين=أهل صولات أهل سيف النشابه
في هددهم مثل هد الشياهين=ليا سرو على القوم عشّو الذيابه
ربعي قرومٍ مع نداء الحي ملبين=وللنايفات الكل يتعب ركابه
بالضيوف رجال واجب مهلّين=الكرم سيّل مزنهم شعابه
نسلي مسلسل بالسلايل عريقين=ساسي هوازن ساس قبل الصحابه
صيتنا بالطيب ذايع سلاطين=لو تعزّوى الذيب عوّا عتابه
برقا وروق امرجحات الموازين=عزّي بهم والفخر يبرق سحابه
صادقين الوعد بالعهد موفين=هـل الفوز والمجد منهم ثيابه
بالعسر ربعي زهابي وباللين=يوم كلن قام ينشر زهابه
وأن ما وفى ردي سؤالاته الشين=ربعٍ هل الطولات وافي جوابه

وسلامتكم