ان كان ما حشمتني حدني حـي ... ما عاد ابي لا مت تبكي عليّه

[حمود غنام المرزوقي]

ان كان ما حشمتني حدني حـي = ما عاد ابي لا مت تبكي عليّه
يا كي قلبي كيتين(ن) على كـي = كي(ن) قديم وكية(ن) فوق كيّة
ويا طي حالي طي طي(ن) على طي = طي الزوالي طية(ن) بعد طية
انا تعبت وخاطري صاير(ن) سي = ساقتني الأيام سوق المطيه
لكن صبرت شوي وشوي وشوي = ومازلت صابر والعزيمة قوية
الحق شئ وناهتي في الكرم شـي = في نعمة الإسلام والأريحـية
ماني بأقلد في الكرم حاتم الطـي = كل(ن) يعرف السيرة الحاتمية
ذي نعمة الإسلام ياللي تبا الغـي = وإلا الكرم يوم الحياة الشقية
يوم العرب تطوي على بطونها طي = حبل البريم اللي يساعد خويه
يشرب به الضميان من شفة الطي = وإلا تحيزم به مع المهمهـية
ما كل بير(ن) يمتلي جوفها مي = ولا كل عد(ن) له عيون(ن) رويه
ولا كل مدن(ن) تشبه جنيف ودبي = ولا كل واحد يستحق الهدية
كم واحد ظله يظلل وله فـــيّ = وكم واحد(ن) ماله عن الشمس فيّه
وكم واحد وقت الدجى يشبه الضيّ = وكم واحد يضيع والشمس حيه
وكم واحــد ذراه يذري ويدفـي = وكم واحد(ن) من فارقه واهنيه
ان كان ما حشمتني حدني حـي = ما عاد ابي لا مت تبكي عليّه

حمود غنام المرزوقي