تمر الهيئة ويقولون صفط على جنب ياراعي الكلب !

[هايم العتيبي]

من أبسط حقوقك .. تجر الكلب وراك ..يعني تسحبه معك سحب ..
فتسحبه وتسبحه ..

تخيلوا معي .. في التحلية ..
واحد يدوج و معاه كلب .. ومن محاسن الصدف
تمر الهيئة ويقولون صفط على جنب يا راعي الكلب !
..

ولا واحد يمشي معه قطو " وفي مقولة أخرى بس " وباللغة العربية ( هر ) ..
ومزبطه ومزركشه ..
ويصادف له برضه مطوع ويحشره بزاوية ويقول أنت وش تبي فيه .. !!
هاه ماتدري أنه حرام ..
وتشبه بالكفار ..
طبعاً خوينا هذا أبوبس ..
لابس طيحني ولا باب سامحني وفي أقل تقدير ..
مزبط شعراته وعاملها على الموضه ..

السؤال هنا .. أنا ما أدري ليه ما نمسك الي لابس طيحني وننزل ملابسه ..
ولانعقده حبتين .. صحيح بيقول أوف وربي تخلف ..ي اي مافي حريه ..

أنا أذكر واحد يلبس كول ..بس ماوصل لدرجه طيحني .. يقول " وربي قرف الرياض مافيها حريه
أنا أول ما أتوظف بروح جده ولا مكان ثاني "
قلت أنا عاد في نفسي .."هم ماوظفوا حريمنا بيظفون جنس ثالث""


المهم نرجع لمحور حديثنا .. قريت في جريدة الحياه أو اليوم ..
مانصه منع محلات بيع الكلاب والقطط و مناصحة من يتجول بها في الرياض وجاري
تطبيقه في جده ..
أنا أتفق معهم في الكلاب لكن القطط ! وأقرب دليل أبو هريرة ..
أنا عندي قطو عاد مو قطو شارع قطو محلات ومتربي في قفص ..
لما أجي بطلعه للحوش يفزغ ولا يطلع ..
يعني ما أقدر أطلعه وأتركه للقطاوه والعرابجه الي بالشارع ..
أخاف يدشر ويعلمونه التدخين..
ولا ينكبون مستقبله ..
فبلشت وربي بلشه ..
وأنا ما أقوم بتربية من أجل إضافة نوع من التسلية على الأطفال ..
طبعاً البس في البيت مايطلع ..
فما أدري حلال ولا حرام
التربية برضة ..
وسالفة الكلاب أتفق معهم فيها ..


فاصلة أخيرة ..


تخيل أنك تجيد أن تخفي ملامحك عن الآخرين
وتبادلهم النبض ذاته ..
وفي جوفك النائم..
أعاصير لاتثور..
والسبب أنك تجيد فكرة يسمونها النسيان ..
ولكني أتساءل ..
أين ؟
قد يفيق..
ومتى يستيقظ من غيبوبتة
الراكدة ,,




..