الفارس المعروف / فيحان الرقاص

[الكينج]

بسم الله وحده والصلاة والسلام على من لا نبي بعده
أما بعد :

هذه القصيده للشاعر الفارس المعروف / فيحان الرقاص من شعراء قبيلة عتيبه (الكرام) قالها في

سنة 1330 هـ بعد أن كسرت رجله وأقام في مدينة الشعراء عند بن مسعود وابن خلف العريفي للعلاج ولقي منهم

الكرم والحفاوة ... فقال مادحا :







راكب اللي طيره لفـح السفايـف.............رفض للتكريب وان حرك خفيفـي



سرحة من دار مكرمـة الضعايـف..............دار ابن مسعود .. هو ويا العريفي



نحره خشـم الفريـده بالوصايـف............. ةان غويت الدرب عد أصفر عفيفي



قل كتب لك واحد دمعتـه ذرايـف............. من صلايب جدكـم ماهـو حليفـي



قل تراهو مايبات مـن الحسايـف............. وده بكـم لـو أقشركـم يضيفـي
ويليت من يعرف بقي القصيدة يعلمناها

آخر تعديل الكينج يوم 01-Aug-2009 في 01:54 PM.

[عبدالرحمن الهيلوم]

بيض الله وجهك

وصح السان الرقاص

شاعلر مبدع جزل

[عبدالمجيد النفيعي]

مرحبابك وياهلا بين اخوانك طال عمرك

الي اعرفه قصيده غير عالقافيه بالقصيده الي انت جبتها

هاذي القصيده قالها شاعرنا بعد مارجع من الشعراء

يقـول حافيـّاً مولـّع ومولاع =
جايـّه من الدنيا هموم وغرابيل=
منه الضمير وواهج القلب يلاّع =
كما يلوع الشعف لدن السنابيل=
ياراكب اربع ربع من عقب مرباع =
شعل شمعليـّات رمل ٍ مراميل=
فج ّ ٍ مناكبهن علن لمس الأقواع =
يعرج بهن إليا عطن ّ المداهيل=
خضع الرقاب ومشيهن بالتخوّاع =
قطم الفخوذ لحومهنـّه معازيل=
عصو عصاو وبالعصا عصو وأطواع=
ومربعات ٍ في سجا كلـّهن حيل=
مافوقهن الا الجواعد والانطاع =
وعيال في دوج الغداري دواليل=
مسراحهن من ديرة المد والصاع =
دار بخيله مير أهلها مشاكيل=
إلهن صلاة الصبح بغثاه منشاع =
منشاع مرميّات خطو المغازيل=
والدرب من بين العرايس ليا تاع =
والعصر يم الخنفسيـّه مخاليل=
انصو فريدة شعر من حيث الاسناع=
وماجذبكم شوف مد الدرابيل=
لازم يطالعكم مع الليل لمـّاع =
نارا ً يقـرّب جمرها للمعاميل=
اول شببكم خمس طبخات ٍ اتباع=
بريـّة ٍ مابهّرت بالزبنجيل=
وبيت ٍ يشيـّد يوم حلـّو بالاسراع=
بيت ٍ لشرّاب الحشايش مداهيل=
ونجر ٍ يلجلج والمخاليق هجّاع =
تلقى رويمي يقرعه تالي الليل=
ومجالس ٍ ماقطّعت بالتـلمّاع =
من جاء محيّا ً به ومن راح ماسيل=
في ضف ابو نايف حمى قاصر الباع =
يوم الخفاف يجانبون الزماميل=
يلوذبه من كان ميـّس ومرتاع =
لن رفـّعوا لقطيّهن المساحيل=
ولا الغفيلي بسلـّة الهند قطّاع =
سيف ٍ مصقـّل من خيار المصاقيل=
حوّاف للاعداء وفارس وقطـّاع =
وحزام بالكربه وبالصبر حلحيل=
وبن خنيصر في ضحى الكون بيـّاع=
يهوي عليهم مثل طير النبابيل=
وغيره ليا شاف المسايير شوّاع=
ويفـّرق اللي يلزمه من محاصيل=
ماهو معيثير ٍ خبيل ٍ وقبـّاع =
وإن جاك في وسط المجالس ليا فيل=
وفيهم ترى ابن التوم للهجن مزواع =
ربعي ذوي ربعي كرام ومشاكيل=
إرجال عرف ٍ وللدين تبـّاع=
وعيـّات لغصون البلنزي نواتيل=
إمخضبـّه بايمانهم كل مسواع =
للريم فوق أرقابهنـّه عرابيل=
غازي وضيف الله على كل الانواع=
ربع ٍ على كثر الخساره مراحيل=
ومعجب عشير إمخوتمت عشر الأصباع=
وابو سند خصـّوه ذيب الرياجيل=
ثم انصوا اللي رفقته تبر الاوجاع =
برجس سعد قلبي ليا ضدّه الشيل=
ومن عقب برجس درّجوا لاخو هزّاع =
فازع حديد الهند عطب المواشيل=
وباق العرب صدقان لكن إلي ناع =
ماكل ّ ٍ اتعبله أركان ومراسيل=
مايبهج الضميان ضحضاحة القاع=
ولايبرد الحسـّات زود التعاليل=
ولاواحد ٍ جايز بليـّا تمتـّاع =
ولاوداي ٍ يخضر جنابه بلا سيل=

،،،،،،،،

انا اذكر في برنامج في قناة بوادي لـ الاعلامي مشعل العتيبي من الحفاه هو ومعه راوي ذيباي نسيت اسمه

عاد مشعل جاب القصه ذي وجاب ابيات من القصيده الي انا جبتها

وبحثت عنها ولقيتها في حدى المنتديات ونسختها لك طال عمرك

اما القصيده الي انت تبي تكملتها مااعرف عنها شي

التوقيع

تذكر قول الرسول صلى الله عليه وسلم :-"المسلم من سلم المسلمون من لسانه ويده" أتشرف بزيارتكم لمتصفحي في شهر رمضان : مــهــاذيــب ، على هذا الرابط أضغط هنا

[سفير الدوله]

الكينج مشكور على النقل وصح لسان الرقاص

[خلف الروقي]

الله يعطيك العاااااااافية

ونترك طلبك لبقية الاعضاء


لعلهم يكملون القصيدة


حتى نستفيد




سوف اعود