المهره اللي راكبه فوق دباب !!!

[حسن ابن شـامي]

السلام عليكم ورحمة الله
قصيده سببها موقف خلال أيام عيد الأضحى المبارك
في الشرقيه وتحديد " الهاف مون" القصيده صريحه اتمنى تنال
القليل من رضـاكم ...


نبدأ بالقصيده صوتيه . ولحفظ اضغط Download

http://www.tntup.com/audio/view.php?...7fffcc79220fab

المهره اللي راكبـه فـوق دبـاب=والعـود ياعالـم يطالـع علاهـا
ويقول يابنتي تسوقيـن بأعجـاب=وهي تلـوح لـه براحـت يداهـا
ما كن حوله يالأجاويـد الأجنـاب=وعيون خلـق .. اطالـع وراهـا
ياعود جعلك تنسقي سم مـن داب=وألا عسى عينك تصـاب بعماهـا
وألا يعضك ذيب وينشـب النـاب=عشان تعرف فعلتك وش جزاهـا
ماتدري أنك تفتح ابواب وأبـواب=قدام بنتك يـوم .. ربـي بلاهـا
بكره تجيك وعندها ولف وأحباب=ماهوخطاها صدق ماهـو خطاهـا
يجي لها واحد ملسـن ونصـاب=وبهرجه المعسول يكشف غطاهـا
والليا عرفت تجي معصب ومرتاب=وتقول مقطوع الحياء من بناهـا
أنا طلبتك لا ... تدور للأسبـاب=أعطيك انا الاسباب وأعطي دواها
أنت السبب ياعود في كل الانشاب=انت السبب في كل شـئً دهاهـا
أعطيتها حريـةٍ .. مالهـا بـاب=وابليس يدفعها .. وتتبع هواااهـا
وحمستها لطيش قـدام الأغـراب=لين انسلخ منها بقايـا حياااااهـا
وصارت تدور كل واحـد وكـذاب=ويقول مهره غير فـي مستواهـا
احسب حساب اللي توعدك بعقاب=قال الرعيه ذمـة اللـي رعاهـا
ياويل قلبي منك ياوقت الأرهـاب=أرهاب في جوف العقول ومحاهـا
لا خير في عبداً من الذنب ما تاب=يوم الحشر يبكي ليالـي قضااهـا
يالله طلبتك يارجا كل مـن خـاب=تغفر لنفسي من خطـاي وعناهـا
وتغفر لشخصينٍ لهم عندي حساب=أغلى من عيون ومن كـل ماهـا
ابويه اللي مات والعمر ما طـاب=تجعله فالفردوس داخـل حماهـا
ابكيه وانا معتلي فوق مرقاب = والروح في ذكراه زايد شقاها
وامي وكل الشعر قدامهـا شـااب=اي والله ان الكون كلـه فدااهـا
يالله طول عمرهـا داخـل كتـاب=اللي جنان الخلد مكسـب رضاهـا
وختامها صلوا على خير الاحباب=شفيع لامه من عقب مـا دعاهـا

وسـلامتكم

حسن ابن شـامي الجعيد
13/12/1428هـ






0