محمد أبوعبيه % مرزوق الثبيتي (مساجلة)

[أمير الذووووق]

مساجلة بين الشاعر محمد أبوعبيه والشاعر مرزوق الثبيتي

لقيتها في مجلة شخصيات وأعجبتني وقلت أنقلها لكم وأشوف ارائكم

البارحه روحي تزايد نكدها=ماسرها طول الصبر والمناوي
همٍ يصبحها وهمٍ هجدها=والهم بلوى من كبار البلاوي
غارات دنياً بالعنا طال أمدها=دنياً تغربل كل قرمٍ فداوي
اهمومها تقبل ويقفي سعدها=اقفاي ذودٍ مقتفيه العطاوي
وأهل الوفا ترمي بهم طول يدها=وتكسي قصير الباع بشتٍ حساوي
وحصنيّها يطلع على متن أسدها=واليا طلع يزمي ولا عاد ياوي
أحدٍ زهد فيها والآخر عبدها=وأحدٍ من الصكات طاح متساوي
من سانعت له فالمجالس حمدها=ومن غرّته تلقا جداه الشكاوي
والناس تبذل في طلبها جهدها=وكلٍ على مد الليالي شفاوي
شنت عليّ احروب ما احصي عددها=وصدت بعد ما بان قول الفراوي
وقول المثل من عز نفسه وجدها=منصبّه لجروح روحي مداوي
واليوم كثرت في طريقي عقدها=وأرسلت خطي يم حرٍ نداوي
الصاحب اللي وقفته ما جحدها=إلا الذي ماهم بويّا التشاوي
هياكلٍ تفنى ولا احدٍ فقدها=تاخذ على بث المشاكل كراوي
يوم الحرار تبين حزة هددها=عند الصويفي ما تخيب الرجاوي
غيث الرفاقه فاللزوم وسندها=معروف أبوتركي بعيد الهقاوي
له سيرةٍ حب المراجل مددها=وله عزوةٍ تعرف نهار العزاوي
ورايه ليا خص القضيه نقدها=بأسلوبه النادر يحل الدعاوي
أرسلت له خطي بشكوى اعتمدها=قلبٍ صبور وهاجسٍ ما يراوي
لعل مرزوق الثبيتي بعدها=يكشف معاناة الضمير القصاوي
واللي بقى فالخاطر أمرّ وأدها=ولا أظنها تخفى زبون الجلاوي

الشاعر / محمد أبوعبيه

بغيت أنام وجا لعيني سهدها=وأمسيت فكري للطواري مخاوي
يوم السهر ذكرى العيون افتردها=أنا على بدع المثايل نحاوي
ماني لا غنّيت البيوت اقتصدها=شاعر ويتبعني ثمانين غاوي
عقب البيوت اللي محمد رصدها=وصارت علي اطباقة أمرٍ سماوي
غنا البيوت وحطني في نصدها=ولا أدري رفيقي هو على ويش ناوي
ركب على الصفرا الشناح ولكدها=صفراً تشوش من السطر والنخاوي
شاعر وعذبات الموارد وردها=ماهوب رسٍ يارده كل واوي
بيوتٍ وسيع العرف ما ينتقدها=حزت بصدرٍ من غثا الوقت حاوي
اهموم وقتٍ كل كبدٍ لهدها=انجض على كبود العباد المكاوي
رفع بيوتٍ طايحاتٍ عمدها=ابيوت واحدهن من العز خاوي
وبيوت الوفا والطيب شلّع وتدها=منها الغنا سرح وجا الفقر ضاوي
دنياً زهد فيها الرسول وطردها=ثم ضمها راع الضمير العماوي
إن سانعت يسبق مطرها رعدها=يسقي مطرها كل وادٍ سناوي
واليا ادبرت يقفا مطرها بردها=عقب الربيع يعوّد الغصن ذاوي
يا بوعبيّه كان طاعتك قدها=واضرب بها وجه وقفا وأنت قاوي
واليا عصت عليك لا تطردها=جنّب وقفّ وخلها بألف هاوي
اقفاي ذيبٍ ليلته ما رقدها=اللي عن المسرى حدوه الشواوي
والناس مهما صارت لا تحسدها=أنا غناوي وأنت مثلي غناوي
والرابح اللي سجدته قد سجدها=وأصبح عن العالم بجوٍ خلاوي
ذي حجتي جاتك وعندي سندها=حجه ماهوب يقولها كل راوي
خل الجنازه سترها في لحدها=لا تشتكي لي ثم تجيك الشكاوي

الشاعر/ مرزوق الثبيتي

آخر تعديل أمير الذووووق يوم 18-Feb-2009 في 05:44 AM.