سلام عليكم..
هــــذه قصيـــده لشــــاعر/ نـــاصر الأحمري . والقصيده تعبر عن نفسها
راكب اللي لامشـى ماحـدٍ زيّـه=لاهـو أمريكـي ولاهـو بيابانـي
وسمه رقومً علـى خـد شاصيّـه=ونقشة الأرقـام وسـم البريطانـي
إنقليـزي والعـقـول إنقليـزيّـه=أنهبل منـه السويـدي والألمانـي
صممـه زنديـق وأمـه يهوديّـه=وخاله إبلا دين وأبـوه نصرانـي
وصنعه ممسـوح وأمـه مسيحيّـه=جـده القسّيـس وآبـوه علمانـي
ورغم مابه مـن خلافـات دينيّـه=في المصانع يختفي فرق الأديانـي
تصبـح الغايـه علامـه تجاريّـه=تقتل الفكسـار وجيـوب نيسانـي
وأنتجو راعي الوصـوف الخياليّـه=مركب الحكام في كـل الأوطانـي
رنجروفـر قـمـة التكنلوجـيّـه=إنسيابـي فـي رفـارف وبيبانـي
كـن حبكـة داخلـيّـه وبـوديّـه=قاف من حبكة عنـاد الحويمانـي !
وكن دقـة سلفـه ألفـاظ عبريّـه=ترجمتها ويـن الاول مـن الثانـي
ولو سميره بنـت توفيـق سوريّـه=صوتهـا بمسجـل الرنـج لبنانـي
خـص لامنـي فهقـت العضيليّـه=وأنشرح بالي وأنـا أكوسرألحانـي
مايوقفـنـي ثمانـيـن دوريّــه=دام إبـن حجنـه تقـدّم ونـادانـي
من هواجيـس الضميـر الحقيقيّـه=ياسلام الله على طيـور حورانـي
دعـوة الغاليـن ماهـي بمنسيّـه=كيف والداعي أعده مـن أخوانـي
صاحبـي فيحـان ياحـي طاريّـه=من هل الطالات ذربيـن الأيمانـي
نسل إبـن رايـق نفيـع ومجانيّـه=في الحجاز ونجد ديـره وشيخانـي
أن وردت كـلاخ والاّ النخيشـيّـه=وأن وردت الشط والاّ أم غربانـي
مثـل مرسالـه ومثـل البجاديّـه=بسْل والحسرج ومحضب وصدعاني
علـم آلاد نفيـع بانـت مواريّـه=يامواري الطيب في كـلّ ميدانـي
يوم بن حجنـه شبيـب وعزاويّـه=في لميلـح جندلـو كـل قومانـي
ويوم صَوْيه خير شاهـد وماريّـه=وتشهد سحيلـه وصبـح المحيّانـي
ويشهد مواجـه ويـوم النضاديّـه=وكم وكم غيره صباحات وأكوانـي
عادة العتبان فـي ذي وفـي ذيّـه=شامخينً مـن قديمـات الأزمانـي
طايلـيـن ونايلـيـن وشقـرديّـه=صارميـن وحازميـنً وشجعانـي
مسرجين الخيل في ساعـة الهيّـه=مهلكين الحيـل للضيـف والعانـي
ذبحـة الحايـل طقوسـات يوميّـه=ماتوقّـت بالضحـا والمسيـانـي
ولطمـة العايـل سجيـه طبيعيّـه=بالقنا والرمـح والسيـف شامانـي
محتميـن الـذود والـدار محميّـه=ناطحيـن الكـود والعلـم نيشانـي
آتشرف يـوم لـي عندهـم جيّـه=وأحبـك القيفـان وآفـل حجانـي
وأنت يافيحـان لـك عاقـد النيّـه=عن لزومك ماأعتذر والعمر فانـي
من غلاك البيد لرضـاك مطويّـه=صوبك التقدير والطيـب يشعانـي
كم وكـم زاهـم ودعـوه وبرقيّـه=وأعتذرت فـلان وفـلان وفلانـي
المشاغـل كلهـا اليـوم ملغـيّـه=لادعـا فيحـان مانـي بمتوانـي
جيت أبارك لـك وداع العزوبيّـه=وجيت أشاركك الفرح ياكحيلانـي
الله إنـه يرزقـك خيـر ذريّــه =وجعل عمرك في سعاده ومتغانـي
ياسليـل الجـود عـون الجلاويّـه=كاسب الطولات ومزبـن الجانـي
سقت لك من ذود الأفكـار منقيّـه=مثل نقوة ذود غـازي العضيانـي
والوكـاد إن البـكـار العمانـيّـه=ساقها لـك واحـد ماهـو عمانـي
لكن سْعودي مـن أهـل السعوديّـه=منسبي معروف وإسمي وعنوانـي
أحمـري ومـن الديـار الجنوبيـه=من يدور لي على الطيـب يلقانـي
صيتنـا عالـي ونيراننـا حـيّـه=من رجال الحجر واللي نهض باني
الوفـا والطيـب عـادات جـديّـه=عاش أبوي اللي على الطيب رباني
أمـدح العتبـان معنـى وقافـيّـه=وأذكر ربوعي وصـح الله لسانـي
دون ظلم ودون نقـص ومحقريّـه=في القبايل كلهـم قاصـي ودانـي
ماهنـا تحديـد والاّ خصوصـيّـه=العمـوم وْنعـم حضـرً وبدوانـي
كلهـم وافيـن ميـه علـى مـيّـه=طيب عدناني على طيب قحطانـي
هاوصلى الله علـى مرشـد التيّـه=النبـي الهاشمـي نسـل عدنانـي
عـد ماقـد بانـت ومالـت الفيّـه=وعد ماهب الهوى خضر الأغصاني
تحياتي.
عبدالله هادي ناشي الفليت.آخر تعديل عبدالله هادي ناشي الفليت. يوم 29-Nov-2008 في 10:36 AM.
« آخـــر الـــمـــشـــاركــــات »
29-Nov-2008, 10:31 AM
مايوقفني ثمانين دورية==دام بن حجنه تقدم وناداني
العرض المتطور
