الزلامي×السديري

[سلطان نايف العضياني]

يسرني أن أطرح لكم مساجله بين الزلامي والسديري

الزلامي

أكتب ويكتب لي أنا اقول حتيش=حبر على قرطاس ماهوب كافي
والوضع ماهو قابلن للمطاريش=ياامير بشرني عساها عوافي
سجيت يوم اغصون قلبي مواريش=واليوم يافرز الوغى شاب قافي
وعروق كبدي يالسديري معاطيش=أمشي وانا مقفي واعاين خلافي
رافقت حجاج الهنود الدراويش=وسريت مسرا الذيب رجلي وحافي
طول المسير وصار بالجو تشويش=متى على الله يصبح الجو صافي
شي(ن) يخدش ثومة القلب تخديش= وسره يعود أليا القلوب النظافي
يكفيك لايح كلمتي دون تفتيش=وعندك خبر ماقال صقر النصافي
أرض(ن) خلا لو مابها لقمة العيش=أخير من رزقن عليه إختلافي
والرمز يكفي الحر والخاتمه ويش=واقبل تحياتي وانا شاب قافي

رد محمد الأحمد السديري

ياطير ياللي فالهوى تنفض الريش=ياللي تهز أطراف ريشك خفافي
ياللي تهضت الصبح عند المغابيش=وقت الصباح وكلن أبصر وشافي
بعطيك سرن مخزنه بالنشانيش=وانحر رشيد ولك بداره ملافي
رشيد من ربعن عداتن مداغيش=وصل سلامي للعديم السنافي
وقله عرفت أهل القلوب المغاشيش=اللي عصوا باللي ثمانه رهافي
زين الصباح منقش الخد تنقيش=عنق العنود اللي ترب الشعافي
برقن يفوتك لو مزونه مراهيش=لاتستخيل أمطار سحبن مقافي
العام قلت أطلب هل الخيل والجيش=أهل البيوت موسعين الرفافي
اليا غدا فعل المراجل تناويش=أفعالهم مثل الفنر والكشافي
وقلوبهم لضيف دايم هشاهيش=وعدوهم سقوه مرن زعافي
دوّر مع الأجواد ضاف العكاريش=وابعد عن اهل الكيد والستر ضافي
رزقن ورا الانذال جوع وعراميش=والشرب منهم يالزلامي عيافي
أعزم وشم واعرض وبعد عن الهيش=مافيه كود الشوك مثل لشلافي
فيه العقارب والافاعي محانيش=والغل وسط قلوب الاشرار خافي
واليا عصوا مالك بنجدن مهاوش=حكمن وسيفن لشريعه لحافي
راحت سنين الخيل مع حزّب الجيش=وهذي سنينن يالزلامي عجافي
رشيد أهل خلك ترا عندهم طيش=ويفرقون أهل القلوب الولافي