الشاعر : فواز فيحان دليم الغبيوي " دعوة للمصياف "

[عبدالاله الغبيوي]

ماهوب كرهٍ لك ولكن علـى ويـن=والله ماطيعـك ياعـدو الرخـامـة
ماني بخويك للسفر ياحمـر العيـن=ولانيب ملحقـك الـردى والملامـة
ولاتحايلنـي اليـا جيـت بعـديـن=انا حذفـت عـن الذلـول المسامـة
وان كان تبغالك خويٍ علـى الديـن=في مصيفٍ تسبـل عليـك الغمامـة
وتبغى الجبال المخضرة والبساتيـن=وشوف الوجيه اللي عليها الوسامـة
فانا مصيفي عنـد سـود العرانيـن=في ديرتـي مابيـن عـز وكرامـة
عند البكـار المكرمـات المزاييـن=ومقـابـلٍ للبـاخـرة والنعـامـة
واليا لفو يمي مـن يسـار ويميـن=الطيبيـن اهـل الوفـاء والشهامـة
ثم ذعذع النسناس بيـن العشاويـن=وغاب الشفق والليل سـدّل ظلامـه
يسوى براد جنيف وجبـال برليـن=لاصار مايلقى الضميـر انسجامـه
ولهايب الجـوزا وحمـو الكليبيـن=وسموم نجد وعـج نجـد وعسامـه
وشمس النهار وصلو بين الصلاتين=ومسح العرق عن جبهتي بالعمامـه
هذا بـرادي لـو اخسـر الملاييـن=في خيمةٍ فـي راس هـاك العدامـه
وإن كان تطرب في لحون المغنيـن=فأنا لحونـي فـي خفوقـي علامـه
الأولـة لأوحيـت حـس المواذيـن=والا قـرا فأهـوال يـوم القيـامـة
وتسمع من الخشية خنيـن المصليـن=للعيـن دمـع وللصـدور انهشامـه
والثانيـة حنّـت قطيـع المحيليـن=لاجالها علـى الرحـول ارتزامـه
والثالثـة دعـو الحـرار الملاويـن=لاقلت هات الشلـو واذبـح حمامـه
هذي لحوني وعندي ان صوتها زين=وارقابهـا للمـجـد ذروة سنـامـه
ان كان زعلانين وان كان راضيـن=عيبٍ علـى اللـي مايثبـت كلامـه
وإن جازلك فأجلس معي ياحمر العين=والا تـروح ورافقتـك السـلامـة