معمر القذآفي .. ماذا قال عنه .:.( سدآح ).:.

[عبدالله الجـــذع]

صح لسان الشاعر سداح

يرتــاح بالـي يوم اغني قافي=الشعــر يطــرب خاطـري بـلحونه
أمــد معــه الوافيـــه واستافي=وأطلق سراح هجوسي المرهونه
آخـر خبـر عند العـرب يا كافي=شافوا وعل شايل جبل بـ قرونه
قــــام العقيـــد معمــر القذافي=يقـذف خطابـه والعــرب يوحونه
يقــول انا راع العــلاج الشافي=والمشكلـــه وحلولهــا مضمونه
أعــلن بيانــه واستبان الخافي=وقــررّ على حجــّـانه المقرونه
أبنسحــب عـن جامعتكـم جافي=حـلّ الجفا .. يا جمعة المهونه !
وقفـت لكـن .. مانفـــع ميقافي=روحوا وكلّن يصلح الله شونه
تجمعــوّا فــي قمـــة المشرافي=وتفرقــوّا والســـــرّ لا تبدونه
أطيبكــم .. اللي لا نخيته خافي=وأرداكــم .. اللي نيّـته ملعونه
عــز الله انـي فـ اللـزوم سنافي=وانتم عرب والبربري تشنونه !
لـو دولتـه عظمى وبشته ضافي=ودرموح راسه ناشبن فـ امتونه
يصيــح وعنـد الجـد ما ينشافي=مجنــون حاكــــم دولـة ٍ مجنونه
واصبح مع اهل المعرفه عرافي=دلاّ لســــانـه .. ثــــم صرّ عيونه
يمسي ويصبح فـ الفراش الدافي=وأم الجديـل يصونـــها وتصونه
ناديـت للثـوره يـا ثـوري كافي=وشلونـــك وراس الحنـش وشلونه
من خلقتك يسفى عليك السافي=والبيت الأبيض يمسحك فـ اركونه
ياكـم لفــاك امــن الخزينه لافي=وسّع جيوب الثوب وقصّ اردونه
محسـونه اشنابك وضوّك طافي=وان ضقت منها لحيتك محسونه
النقـص يبقــا نقص مـا ينضافي=وابو جمــا يقضب جماه سنونه
اعمـر موسى ماعليك خلافي=تنقـز وراه ونظرتــك من دونه
امين عـام .. وكامل الأوصافي=ومعك الأمانه ماهي ابـ مامونه
والشرق الأوسط حذفة الحذافي=أحــذف عرفـاته على شارونه
يازارعيــن السدر والصفصافي=نعنــاع .. لايزعل على ليمونه
عسا الجزيره ما تروح انصافي=ولمّ الشمل مغسول بالصابونه
أمن المحيط اليا الخليج الضافي=رحنا وجينــا .. حبّـة ٍ مطحونه

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا