رسالة و كلمة راس للوالد خادم الحرمين الشريفين

[فالح الهاجري]

اقرأ للآخر



حبيت اختبر اليوم هامش الحرية في المنتدى
و أوجه رساله للوالد القائد خادم الحرمين الشريفين ( حفظه الله وأطال في عمره )

من واجبات الأبووووه أن الأب يستمع لصرخات أبنه وضمه على صدره وإذابة كل آلامه
والملك مثل ابوي ،، لأحد يتدخل بين أب وطفله

::::::

ابشرك يا خادم الحرمين الأسعار مضبوطة والمواد الغذائية متوفرة
ما نقصنا بس إلا الخبز يرفعون سعره


وخذ عندك بعض الأسعار :..

قشطة المراعي صارت 4 ريال
حبة المظبي 22 ريال
الكفرات ارتفعت 30 بالميه
الأدوية 25 بالمية

تخيل يا خادم الحرمين جبن كرافت والمراعي السايل ارتفع
طيب وش نسوي لبزارينا ؟؟؟!!
المشكلة يحبون الكرافت السايل مع الصامولي

الببسي صار 20.5
والأيجارات أرتفعت
وقسايم المرور زادت

الحمدلله على النعمه أمن وآمان
الله لا يغير علينا

حتى رز ابو كاس ارتفع
لا وأزيدك من الشعر بيت
رزمة الكراث والبصل صارت بريالين
شفت شلون حنا بنعمه

:::

بس تكفى كلمة راس طال عمرك ....

ما ودك.. تنزل رواتبنا شوي ... ؟
عشان ... نبني للأردن 70 ألف وحده سكنيه ثانيه
ونعطي لبنان مليار ونص دولار
ونرسل لمصر المعونه السنويه

تعرف ماشاء الله حنا من كثر الفلل التمليك
الناس صاروا يأجرون ببلاش

ممكن طلب يابوي ..
ابي سلف
12000 ريال
عندي دين اسدد فيه لي سنه ولا خلص ....
كل شهر 500 ريال
الله يرحم حالنا والله ..

:::

ابشرك طال عمرك
قبل كم يوم حطم سعر برميل البترول الرقم القياسي وصار يباع بـ 99 دولار
و رصيدي بعد حطم الرقم القياسي في نفس اليوم وصار فيه 17 ريال
الحمد لله شفت كيف أنا بخييير

:::

أحب اطمنك يابوي
صرنا نسوي رجيم غصب عنا
تعرف اللحم ..... ما عاد نعرفه
حتى الدجاج ..... ما عاد نأكله

صرنا رشيقين

تسمع بالكرش ..... ما عاد نشوفها مثل قبل

تسمع بالبطن اللي لاصق في الظهر ....... يووووووه في كل مكان نشوفه

نم قرير العين الشعب بخيييييير

لاتتعب نفسيا ًو دور في النت توأم تفصلهم

توائمنا ليش ينفصلووو .. ؟
صلة الرحم زينه خلهم يتشابكون طول العمر
يمكن لو فصلناهم يتهاوشون ويفترقون ...!

خلهم متشابكين في جسد واحد

الله لا يغير علينا


:::

أبشرك طال عمرك شعبك تطور
استبدل البكاء بطعم الملح ببكاء بطعم الدم

آآآآآآآآآآآآآآه يا حلو مذاقه
ودك تجربه؟؟

انا أقولك و شلون
نظف بيتك من حليب الأطفال
نظف جيبك من الفلوس
نم ومخباك فاضي
خل زوجتك تصحيك من النوم قبل الفجر
وتقولك أن ولدك ما عنده حليب
دق الشماغ ولف على جيرانك

دور سلف.. علشان تشتري حليب لطفلك
الكل بيطردك لأنهم طفارى
انس انك ملك وأرجع للبيت
بتدخل على أنغام بكاء ولدك
عندها بتحتقر نفسك وانت عاجز عن إنك تلبي إحتياجات ولدك
عندها بتلعن اليوم اللي انولدت فيه
بتلعن اليوم اللي انولد طفلك وصرت مسؤول عنه
عندها بتضمه ورح تبكي من القهر
و بتنزل دموعك وتحس بطعم الدم في حلقك

:::

تذكر طال عمرك يوم حنا صغار وش كانوا يقولون لنا .....؟؟!

كانوا يقولون الرجال ما يبكي
عيب تطلع دموعه

صرنا نصيييييح عادي
البكاء صار ملازم لنا

والسبب / كومة لحم ( أطفال و نساء ) في رقبة الواحد
يصيييح ؛ لأنه عاجز عن توفير الحياة الكريمة لهم ...

:::


بس ودي أقولك شي قبل ما أروح أصيح

تدري وش معنى الرجل يبكي قدام زوجته وأطفاله ...؟!

معناها تساقط كل قيم الرجولة اللي تعلمناها في طفولتنا
معناها إحساس المرأة بالانكسار وعدم الأمان .....
معناها خنوووووع ما بعده خنووووع للظروف القاسية اللي وضعنا فيها
معناها أمور كثيرة ما راح تفهمها ....


لأنك بعييييد عنا وماتشوف حالتنا كيف صارت

الشعب كله بخير

[فالح الهاجري]

شكل الموضوع ما اعجبكم

[عبدالله الجـــذع]

فالح موضوع جميل ورائع.

ماقصرت يالغالي على هذا الطرح..

وان شاء الله الوالد خادم الحرمين الشريفين يرى لنا حلا سريعالا مع هذه الأرتفاعات الغريبه ..

مشكور ولاهان راسك..

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[دوسي زهراني]

والله موضوع رايع يالغالي ..


وان شاء الله يوصلونه للملك ..






























تحيـــات عـــاشــق الاهلــي الملكــي وجمهـــوره


نـــايــف الدوســي الزهــــراني

[فهد النفيعي]

الله يعين يافالح

ياخوفي بنصير زي مصر الواحد مايجيب الا ولد ولا ولدين بس