سيدي الامير سلمان بن عبدالعزيز ال سعود

[عقاب بن سقيان العتيبي]

سلام الله سلام الله على اللي مايبي تعريف=ولاينكر وكم يذكر عطا كفه ومعروفه
كريم الطبع واكرم بالعطايا من سحاب الصيف=ولا تفضي ولاتفضى دواوينه من ضيوفه
تهاليه سعد ومصافحه ومجالسه تشريف=يمانينا تحت يمناه في الوقفات مشروفه
محنك مايصير الغدر من طبعه ولا التطفيف=ولا يرضى تروح القوم بالامجاد وتطوفه
سعودي يجيد الرمي عند الرمي والتهديف=نداوي بالكرم يمناه جزامه ومالوفه
نظامي يكره الاهمال في الاعمال والتطويف=وله نفس على الايتام حانيه وعاطوفه
وله يمنى تشد اللي طرفه عن الديار رهيف=ليا ثاروا وقود الحرب والقشران عاصوفه
جليس رجال رجل وهرجته من حكمته تلطيف= يمد الكف راع الجود مليانه ومخلوفه
رجل دوله كلامه مايجي زله ولاتوليف=تهاتف له ميات الخلق بالتاييد وولولفه
ولا يلحق فوايت مامضى حسره ولا تحسيف=مقدم في مقامه والصعاب تعن معسوفه
غزير العقل واجود من يجيه من الفجاج الضيف=ولد عبد العزيز وفي دهاه وصوفه وصوفه
حكيم في الاماره منتصب في منصبه ومنيف=حكمها بالعدل وارتصت الابطال بصفوفه
غدت من جود جوده رمز جود ومثل بر جنيف=عريقه في الاصل ومجوده وتعارق الكوفه
سعودية نسب تطغى وصايفها على التوصيف=مثل سلمان بالاحسان والجودات موصوفه
جميله بالجمال وبالعفاف ولا تبي تنحيف=طويلة عنق ممشوقه ومحشومه وغريوفه
سليلة مجد واجمل في الحقيقه من حلوم الطيف=غلاها جاب ابوك وجت على مشهاه وشفوفه
عفيفة عرض ماتكسى ولاتلبس عري وسخيف=كريمه بالحرير الخام والديباج ملفوفه
مصانه صون صون ولا يجيها النقص والتزييف=ولا جتكم ياخو سلطان بالمنوات موقوفه
خذتها يمنى ابوك من العرب بين العرب بالسيف=وشامت له وعفت له صغيرة سن غطروفه
قبل عصر الرخا قبله وقبل الخير والتوظيف=حكمها بالحسام وبالكتاب وباست كفوفه
ولد فيصل ذخر فيصل وابو فيصل وابا العريف=سلايل عزوة بالنسب منتسبه ومعروفه
هدفه الحكم كل الحكم كله مايبيها هديف=يبيها طوعة بارسانها ماهيب مردوفه
اخذها في شبابه من ذراعه وترك التسويف=توجه بالركاب من الكويت ورهف سيوفه
رحمك الله ياللي ماتكيف من دلال الكيف=قبل مايبرك العدوان رهن الحق مكتوفه
اخذ حقه مكمل ماقبله ولا رضيه نصيف=ولا تقبل من الغصاب بالاشراط منصوفه
غدت في ظلكم ياهل المكارم للمواطن ريف=عسى ديرتك بالخيرات يابن سعود مريوفه
تهيم بحب سلمان الرياض معاهده ومعيف=تحبه حب عشق وفيه هيمانه ومشغوفه
وهو راع الجمايل والصمايل كل يوم يضيف=مشاريع على الانجاز منجزها ومضيوفه
نحبك ونتباها يالامير وكل فعلك شيف=نعده في الرياض انجاز بل واعجاز ونشوفه
حييت بنا سنين ولا شكينا في زمنك الحيف=ولا شفنا ولا عشنا الزمان الشين وظروفه
نعيش الامن في الاوطان والتطوير والتثقيف=رخا واسخى رخا حتى اليتيم يجيه مصروفه
نعيش بصيف عزك دام عزك مانعيش صويف=زمانك خير خير في رخاه وتبرق قنوفه
فداك الرجل لايقدى ولا يندى ولا قد ظيف=ضريع شجرته في غمرته مايكسي ضعوفه
بخيل يستعر حرصه على الدنيا سعيرة ليف=يموت ولا يضيع ريال يالوفه ويالوفه
فداك الرجل لايفزع ولايجزع ولكن كيف=يعيش الحر عيشة ديك والاعمار مصروفه
فداك الرجل لاخيره ولاسيره ولا تحصيف=على عمياه في عمياه ياحيفه وياحوفه
مزاعمه الجهاد وقصته ياسيدي تخريف=مغامر طيش يفتي طيش والجهال مخفوفه
فيات في فتنها فتنت ومنتفه تنتيف=تعيش مع الضلال البغي والارهاب وصنوفه
مجانبها الصواب وجففت بعد الجفاء تجفيف=سقام عقول والاوطان بالاخطار محفوفه
عسى فال الردي والمعتدي فال ردي وهيف=عساها تحرم الكوثر عن الكوثر وهفهوفه
خطاك السو ياللي تمن المظلوم والخييف=خطاك من الزمان الميل تكفى الميل وصدوفه
يقولون الحقيقه ما تبي ساعي ولا تظريف=ولاتغطى ولو تغطى تقوم الصبح مكشوفه
ترى الحاسد هو الحاسد يجيد النمك التحريف=يغير في الكتاب من الكتاب ويلوي حروفه
مخادع ما يهاب الحلف باثر الحلف والتصريف=يغرر بالغرير انه جهاد ويكد حلوفه
مريد قد تمرد ما يعرف النفل والتكليف=هبة لحيتك يالهابي عسى لحيتك منتوفه
تنادي بالخراب مجاهرات وزمرتك وقيف=نسيت ان الوطن برحالنا ماهيب مخطوفه
خلقنا في وطنا صف واحد ماني تصفيف=ولا نرضاك منا وانت يالخوان ذالوفه
ولا تمشي علينا لعبة الارهاب والتعنيف=يدين تشهر الارهاب متروبه ومكفوفه
تعيش اسيادنا ببلادنا ولا العدو ضعيف=تعيش اسياد خير بلاد والشجعان مصفوفه

شعر/ عقاب بن سقيان العتيبي