بندر بن محيا قصة حب !!القصيدة للقراء والتحميل

[نواف العصيمي]

هذه القصيدة التي شارك بها بندر .. وتأهل بها لمسابقة المليون
.. نص كامل ومقطع صوتي رائع ..

أضغط هنا للتحمـــيل

ذَهَب كل الكَلام وفْضّتَه يْوم السَّكوْت نْحَاس= قَبْل مَا اشْوفك أشْوفك نَهَر مِن مَنْبَع عْذوبَهْ
أحْبَك مِنْ زَمَانْ البَردْ..أحْبَك مِنْ زَمَاْن اليَاسْ=كْثر مَا اْصْحَى مِنَ أيْام الْوْلَه وأدخْل فْـ غَيْبوبَة
أنَا وحْدِي حَبِيْبْكْ لو قَريْتك فِي وجِيْه النَّاسْ= وَلَوْ وجْهَكْ ذَنُوب ٍ مَالهَا فِي سَجْدتِي تْوْبَة
تْجِي مِثْلَ العَزَا بَعْدَ العَزَا فِي غَيْبَة الأعْرَاسْ= وْتْروْح أشْبَهْ بْـ دَمْعَة فـْ الْوَرَقْ بـْ الصَّمتْ مَكْتُوْبَة
مَعَكْ حِلمي مِنَ المَا وَالميَاهْ تْكَذّب الْغَطَّاس= ياكْثر الليْ غْطسَوْا فِي حُبك الهَايجْ وغَرْقوبهْ
مْجَارِيْح ٍ نَفَاهُم دَربهُم لـْ عْيونِك النّعَاسْ= تَعَدّوا يَنْشدونْ الْصُّبحْ عَنْ رمْشك وضَاعوا بْه
يْحَطبُونَ الضّلْوع فـْ غَابَةْ أَيَّامكْ بَلْيّا فَاسْ=شِتَاهُم ضِحْكَةْ شْفَاهكْ..وشَافوْا نَاْر مَشبُوْبَةْ
تَخَاوّو بَيْنْ مِنْ دَوَّر ذهِيْبْ* ومِنْ سَرَحْ عَسَّاس= حَيَارىً غَرّهُمْ كَاذِب هَدَبْك وْ وجَّهوا صوبْه
وانَا الْبَارح عِيْونِي فِي عْيونْك مَرّهَا وسْوَاس=بَنَيْت سْنِينِي البَيْضَا لْهَا طوبَهْ عَلَى طـوبَهْ
أردّك للحَدِيثْ بـْ لَهْفَةْ الْبَاردْ بَليَّا قْيَاس= وتْسولِف سَالِفَةْ لَلْيّ عَشَقْ مَا هِيْبْ مَرغُوبَةْ
قمْ اجْلِسْ فـْ الْحَنَايَا قَبْل مَا يْغْتَالكْ الْقرْطَاسْ=شَعَرْتْ انِّك تَبْي تَهْرُبْ وَرَى النِّسْيَانْ لـْ دروْبهْ
أنَا محْتَاج لْك..مَا احْتَاجْ ليْ لاتَنْشد الأنْفَاسْ=عَنْ أكْبَر حَاجة ٍ فـْ أقْصَى نَفَسْ شَاعِرْك مَحْجوبَةْ
طَويْلةْ طَاولتْنَا واسْتَقّرَّ المَا بـْ قَاعْ الكَاسْ= كأنَّ السَّالفَةْ غْيمَةْ عَلَى شْفَّتْك مَسْكوبَةْ
جَلَسْت مْقَابلك وَجْهَاً لـِ وَجْهْ بـْ جَنبِْيْ الهُوجَاسْ= إذَا مُستَقْبَلي وَجْهَك ورَى الأحْلاَم مَرعوبَةْ
نسِيتْ يْدَيّ بـْ يْدينَك بـْ صُدفَةْ كنَّها الإحسَاسْ= وذكَرْتْ إنِي نسيْت أذْكُر يْديْنكْ كَانَت أعْجوبَةْ
تَهَيّلتكْ طَعَمْ هيْل بـْ فَميْ مِنْ بَعْد طَعْم عْمَاس= بـْ فِنْجَال ٍ نَعَسْ مِن نَظْرَتْكْ بـْ أَهْدَابْ مَصْبوبَةْ
سَرَىْ الليْلَ البَهِيم بـْ رِمْشكْ المُسْتَهْتِر الخَنَّاس= وليلَةْ غيرْ هَاذِيْ مِنْ لَيَاليْ العُمْر مَشْطوبةْ
إذَا مَا يَعْشَقْ العَاشِق سَهَرْ شَكواهْ بَعْد نْعَاسْ= يَنَامْ أحْسَنْ لِه ويمَسَحْ دمُوعه فِي طَرَفْ ثْوبَهْ
إذَا مافَجَّرَ الشَّاعر قَصيْدة صِدقَهَاْ نِبْرَاس=يبّل الدَّفْتَر ويَشرَبْ حبْر كِذْبه ومَكتوبهْ
وانَا أعْظَم مِن يْحب إليَا هَدَا بَاله عقْب مَا انحَاس=أعيْشْ بـْ كبْرِيا والقَلبْ بَيْن يْديْن مَحْبوبهْ
مْطَر هَذَا الوصِل يومَ الهَجْر يمْلا الضْلْوعْ يْبَاسْ= وعَسَى المَاطِرْ عَلَى يابِسْ ضْلْوعيْ يْرخْي نْصوبهْ
مْن الليْ يشْبهَكْ؟ يالفَاتِنْ المُسْتَصْعِب الحَسَّاس= ليَا حَاولتْ أشوفَكْ فـْ المَلامِحْ قَبْلْ هَا النُّوبةْ
يذّكرنيْ بِـ مِنْ لايشْبهكْ مِنْ يشْبهك لادَاسْ=عَلَى أعْصَابِيْ سَفَركْ ودوبْه أيْقَظ غَافْلكْ دوبْه
وأنَا قَلبيْ وطَنْ أرضَهْ سمَاكْ وبيتَهْ الكُراس= جبِينَك شَمسَهْ فـْ صُبحَ الوَلَهْ وجْروحَكْ شعوبهْ
أنَا قدّامك اخْتَرنيْ حَبيبكْ قَبْل كِل النَّاسْ=أوْ إنِيْ مثْلْ عشَاق ٍ هَووّ رمشكْ وضَاعوا بهْ!

ماجاء في باب النِّسيان..

وقِّفْ النسيان تكفى يامْتناسي=خلّه يِوقف ثواني، ينتظرني
قلّه إني قاسي ٍ والوقت قاسي= بختصر وجهه وهو لايختصرني
ودّي إنه لاعدى من فوق راسي=ينتصر لي، ويْخَسْرني، وانتصرني!
لا يدوّر للسهر فاقصى نعاسي=ماشكرته كذب، كذّاب إن شكرني
جبت له فـ الذاكرة ستة كراسي= يجلس ابها، وأنت بعد أيام زرني!
قد عزمته في ضلوعي والمراسي= وقد رفض دعوة جنوني واحتقرني!
قلت : يا مجنون لا تسمعك ناسي= تعتبرنيْ إنسان..يعني تعتبرني
شاعر، مْعَلِّم، وإنسان ٍ خيالي=كم عبرت قلوب، ما قلب ٍ عبرني!
أحمل الطبشور فيْ الصف الدراسي= واختبر أطفال.. تبغى تختبرني
قالوا استاد: القصايد من مآسي=قلت:ياصغار الشِّعر كسر وكسرني!
بحر لا اتمدد خذل روح المراسي=وأفصح النورس على الشط، ونثرني
بعض الأحيان الحكي لونه نحاسي=والكلام إن ما عذرته ما عذرني
وقّف النسيان تكفى، يامتناسي=ودي أنسى وأنت بعد سنين زرني!

التوقيع

[عبدالرحمن الهيلوم]

مشكور يالغالي


((( يالله اتوفقه وتوفق شعار اعتيبة ابلهيلا في كل محفل )))

[محب الهيلا]

مشكور وماقصرت على النقل

[fahad8088]

صح لسان الشاعر

ولاهنت على النقل يابو راكان

[دوسي زهراني]

سلمـــت ولاهنـــت يانواف وبالتوفيــق لولــد محيـــا ..




















تحيــــــــات عـــــــاشق الاهلــــــــي وجمهــــــــــوره

نـــــايـــف الدوســــي الزهـــــراني

[نواف العصيمي]

يعطيك العافيه على المرور


..ياعبدالرحمن


ولك التقدير والإحترام

[نواف العصيمي]

يعطيك العافيه على المرور


..

يامحب الهيلا

ولك التقدير والإحترام

[نواف العصيمي]

يعطيك العافيه على المرور


..
يافهد

ولك التقدير والإحترام

[نواف العصيمي]

يعطيك العافيه على المرور


..دوسي


ولك التقدير والإحترام