إبداع في وصف الذلول

[حسن الشراري]

أخواني اعضاء وزوار هذا الصرح الشامخ

لمعرفتي التامه بإهتمام الجميع في الإبل والهجن

والذي نعتبرها من تاريخنا وموروثنا الشعبي المشرف


حبيت أن أشارك معكم ببعض هذه الرائعه الشعريه

والذي يرددها الكثير من الرواه وكبار السن لما جاء فيها من إبداع


وقد ذكرها الراوي/ فواز الغسلان بأحد إصداراته وقال عنها

((من أروع القصائد النبطيه))




أترككم مع هذه الرائعه

قلبي يزوم وزود طيشه بلاني =وطير النيا يمكن رجع عقب ماغاب
توه قضيب وزاد بالأكفخاني = سبقه قصير وماقعه دون مقضاب
قلت الفرج بالقافيه واكتباني= دام القلم مطواع والحبر سكاب
ياراكبا من فوق بنت العماني =حول الرباع وتو ماشقّت الناب
فيها من العيرات وقم الثماني=محفوضة التاريخ ميلاد واضراب
بنت القعود اللي يفك القراني=مرباه شط النيل مرتع ومشراب
ضريبته بالعيش صعب المجاني=تدفع لنا غصبا على قوم غصاب
يشهد لنا راعي نفي بالاغاني=وحمود ناصر وبن ملحم وحطاب
عيونها جمر الغضا الشلهباني=في جورتاً مابين كيراً وشباب
فقس العلابي ثم عكف الاذاني=راس الخبير اذا وقف واصلح الكاب
مبرومة الفخذين والزور باني =بينه وبين اكواعها قفلة الباب
شيب الشواغر مع مميل الثفاني=عراضا مرادفها كما قار ديراب
الصيعريه للعصا ماتداني= ولاهي من اللي يشعبونه بمشعاب
تلمح مذانب عينها الخيزراني=هاجت وماجت ثم ساجت بضبضاب
عقب الربخ ساج الحقب للبطاني=شابت مرافغ بطنها والحقب شاب
ان درهمت بك مع سماح المتاني= وحان المسا والدرب عثعث ودبداب
يزيدها شوف الظلام جفلاني=كن السعارة ينهشنه بالانياب
تزلف على اللي سيرها بروجاني=فريد من سرب القطا شافها عقاب
وكل ما قربها زادها بالجناني=تزيد مع لفح الهواء والهواء هاب
حدا نظر خشما عفر مشفقاني=حصا وبر كن النحر باب خشاب
تقدم على السرحان بالهوذلاني=ينزّى الحصا من خفها تقل مشهاب
صفق الهواء بجنوبها بصفحاني= صفقات معصيراً على صوب مزراب
دقات قلبه بالضلوع الحواني = ضرب الدفوف بعرس تلعات الارقاب
مزبان مدمياً بعيد الطناني = لحم ودم وروح وتثير الأعجاب
بالشد لاترغي ولا مضبحاني = مثل الهنوف اذا استحت عند خطّاب
وأن مس حبل شدادها بالمثاني = تبدي الرضا بسكات بعيون عتّاب
ترطن رطين مترجمن طرطمانمي = شاف المحرك عاطلا فيه لولاب
تشدى لشاحوفا بعيد المواني = حس الخطر من زورقا جاه قراب
شاف الخطر بالعين والموت داني = وتو البحر ماهاج والبزر كباب
الجم راكد والمسير ركزاني = صفق المراوح بالبحر صفق مغراب
مارافقت قفلا ولاهي بواني = ولا شدها راع الزماميل حطاب
ولا دربوها ملاعبين الغواني = عفر النظر مايركبة كل ركاب
مرباعها بين العلم والجراني = ومقيضها بالهوج والبرق معزاب
في ضف نجعا يكسبون الرهاني = أن صار يوما بين مروي ونداب
ركض النعامه بالحفا واللياني = وحبل الرسن مايقضبة كل قضاب
مايشتريه التاجر المربحاني = أيضا ولا تهدى على كل طلاب
تشبه عوارض ساقها الشيشخاني = وسم السليم بنصفها كنه الداب
يوم الحرايب والعدا من زماني = مدربينه بين غزوة ومطلاب
نلحق عليها راكبين الحصاني = وصفرا يكضمن ألأعنه بالأجناب
ماقلت فيها عيب للمودماني = الجيش هن والخيل من ضمن الأسلاب
ومن قال عيب قلت فيها مثاني = على الخبير المبتدي ذكر الأسباب
دليلها واحد من الكوكباني = الجدي ولا سهيل كان القمر غاب
حطت نحرها في سهيل اليماني = ولو شفت اثرها قلت مضراب نشاب

هذا وللقصيده بقيه ولكن هذا ماقتصر حول وصف الذلول



لشاعر/ عايد رغيان الشراري

[مرزوق حمدان العتيبي]

...
..
.
صح لسان عايد الشراري
.. ولاهنت ياحسن على حسن اختيارك .
....

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[حسن الشراري]

المشاركة الأصلية كتبت بواسطة مرزوق العتيبي

...
..
.
صح لسان عايد الشراري
.. ولاهنت ياحسن على حسن اختيارك .
....

مشرفنا المميز ذوقاً وخلقاً


صح بدنك شاكر حضورك المشرف

[محب الهيلا]

مشكور وماقصرت

[فهد النفيعي]

...
..
.
صح لسان عايد الشراري
.. ولاهنت ياحسن على حسن اختيارك .
....

[حسن الشراري]

محب الهيلا


لاشكر على واجب اخوي شاكر حضورك




فهد النفيعي


صح بدنك اخوي شاكر حضورك

[شبيب شافي الملعبي]

مشكور على النقل

[حسن الشراري]

شبيب الشافي

لاشكر على واجب شاكر حضور