الفرق فرق العقل والقلب والذكا (للشاعر حسين العتيبي) مميزة جدا

[ابن نجد]

الشاعر حسين العتيبي امتعنا بالكثير من قصائدة الجميلة ، وهذه احدى قصائدة الجميلة والتي تتكلم عن النصح ، ارجو قرائتها لما تحويه بين سطورها من امور يجب ان يتحلى بها المرء.


القصيــــــدة :

ياسعود انا بنصحك واسمع نصيحتي
نصيحة اللى ينصحك من تجاربه

لو اني صغير السن ماشاب شاربي
لكن روحي للمفاهيم داربه

وعمر الفتى ماهو دليل(ن) لفهمه
ولا كل من شيّب بفهمه يشاربه

كم واحد(ن) شيبه يلوح بصوابره
وغطّا سبايل لحيته مع شواربه

ولو تنشده يحتار ماجاب هرجته
من الفهم خالي والمناهيج خاربه

وكم واحد(ن) بالعمر توّه بشبّته
بالفهم يذكر والجهول استشاربه

الفرق فرق العقل والقلب والذكا
ماهوب في فرق الزمان وعقاربه

ياسعود جعل الله يوفقك للفخر
وترجع ونفسك من صدى العلم طاربه

العلم نور(ن) يجذب الناس والجهل
ظلما(ن) بعمرك ماتولّع كهاربه

اصعد صعود الحر وارقا مع العلا
وبعّد طموحك لين تارد مشاربه

اتعب على العليا ترى الهون والكسل
منهج ضعيف(ن) حاني الذل غاربه

وحافظ على دينك وقم في فرايضه
ترى الصلاة ايّات منكر تحاربه

واختر رفيق(ن) ترفع الراس رفقته
كسّاب نعم(ن) بين ربعه واقاربه

قرم(ن) ليا احتجته ينومس بفزعته
مضارب الحر القطامي مضاربه

هذاك خلك دوم جنبك بجنبه
صاحب حليف الطيب والنذل حاربه

وابعد عن النمام والنذل والردي
وعن الخبيث اللى خباث(ن) مأربه

ترى السفر ينبيك والبعد والبطا
وينبيك لاشد الزمان بمكاربه

تراك في دار(ن) سككّه مفتّحه
من شذ عن نهج النقا لاتقاربه

والنفس بالك لاتطاوع شفوفها
كم نفس مرء(ن) من سواياه تاربه

واحفظ وصيّة من بدالك وصيّته
عود(ن) مساره لازم انه يساربه

مسار(ن) يشرّف ماتعدد خصايله
ترى مساره بالزمن يستناربه

عساه بالجنه ترفّع منازله
في جاه من ماخاب من يستجاربه

واليوم شمس العلم والمجد مشرقه
وشمس الجهل ياسعود هالوقت غاربه

راحت ليال الخيل والسيف والقنا
وجانا زمان العلم واللى يثاربه

واكثر شباب اليوم باللهو والسهر
يجيك واحدهم دعاويه كاربه

الوجه بارد والسواليف بارده
تقول كنّك في مخمّسك ضاربه

لا حافظ(ن) دينه ولا سلم ربعه
ياعنك مايسوى لك الله جواربه

هذاك نقص ولا تعده مع الملا
لعل مندوب المنايا يغاربه

واليوم لاتجهل معاني نصيحتي
نصيحة اللى ينصحك من تجاربه

وياسعود جعل الله يوفقك للفخر
وترجع ونفسك من صدى العلم طاربه

نرجو ان تحوز قصيدة الشاعر حسين العـتيـبي على الاعجاب لما فيها من النصح والارشاد.
-------------------------------------------------------------------------------
زماننا غير زمانهم وحتى نتذكر الاولين
اخوكم ابن نجد

[ابن فرحان]

بيض الله وجهك يا ابن نجد وصح السان حسين العتيبي ..
الحقيقه قصيده ممتازه جدا
لها روح ومعاني طيبه

[ساري ليل]

صح لسانك يا ابن نجد ولسان شاعرها

قصيـدة من القصائد المميزة .