أول مشاركه لي قصيده لشاعر لافي حمود الحربي

[ثبيتي والوفا بيتي]

هذه القصيدة من أجمل ماقرأت في الرفقة احببت ايرادها كاملة وهي للشاعر لافي بن حمود الحربي وهي انشاء الله انها بتعجبكم وانشا الله الخير جاي وبعطيكم بعدين قصيد من بدعي


يامكثرين الهرج لاسمع ولااجيب
تريحوا من فضلكم واسمحوا لي
تريحوا لاتلحقون المشاهيب
على الردى ماني شفوقن عجولي
بالعقل والصبر ادب النفس تأديب
ولا لها مدة تصول وتجولي
خلجن ترازم في سياج المحاديب
مافيهن اللي بالعقال معقولي
أشد واطيب زور من شمخ النيب
اليا ضاع مفعول الحيل والحلولي
أنا لياماقلت للقول ترتيب
حتى يجي كي (ن) على فك قولي
ليا ارسلت لافكار القريحة مناديب
ترايعن من عقب ماهن جفولي
لكن مالي من وراها مكاسيب
ولوان عشاق القشر صفقوا لي
مايستفيد الا العدو والاجانيب
ولاني مطيع مقرقعين الطبولي
خليتها تعطي فجوجن مجاديب
جرباً تجود في رسنها مهبولي
والله لاجنب دام لي درب تجنيب
من شرهة حشام الرفاقة خجولي
لو انها بين النحر والتلابيب
من الحيا وجهي ماهوب مغسولي
طبعن لنا نشب عليه ونشيب
و طبيعتن لعلها ما تزو لي
على الجماعة للجماعة مواجيب
إلى جهلواقدر الرفيق الهتولي
ماني على ربعي قريب محاضيب
ادناه مايخليني اسرج ذلولي
إن جات من طيب شقاها على الطيب
لو انها أعوج من رقبة الذلولي

وان جات من مسكين منطق واساليب

حطيتها بين الثرى والنعولي
لاحركت شعرة ولاطلعت شيب
ولاضيقت صدري ولاطق جولي
وان كان في صبري على ميلهم عيب
العيب تفتيش الصرر والحثولي
لاقمت تذكر في رفيقك عذاريب
وتبين عيوبه لذولا وذولي
صبرك على ربعك علاج وتطابيب
يقصر حبال السالفة لاتطولي
حتى مايلقى في طرفها مقاضيب
كراه خير وللمشاكل ميولي
وليا بليت بتايهن شره وصعيب
يقول أنا العراف وانت الجهولي
قل الله الله ياحصان الأطاليب
يالفاهم العالم عطيب الفعولي
هذا الكلام اللي مافي صحته ريب
لانيب لاحولك ولاانته بحولي
حصان وابن حصان طيب مجاذيب
وبالمعرفة رجلن محلي ودولي
خله يروح ويخطي الدرب ويصيب
ويقول مابالناس عرضي وطولي
والفرق ماهو باللحى والاشانيب
الفرق بين الناس فرق الفعولي
كم واحدن تحسن به الظن ويخيب
السن يضحك والفواد معلولي
واللي غدت به كلمتن مالها غيب
ماهو من اطيب ربعي اللي غدوا لي
يالله عساها صيحتن في قفا ذيب
وقلع النيا بيني وبينه يحولي
الرجل مايغصب على الطيب تغصيب
لاصارماهو دل ضمن الدلولي
من عادة اللي طيبه يحضر ويغيب
لاطالت الرفقه زهوقن ملولي
وليابلنك غبر الايام بصحيب
في مستوى طيبه صعود النزولي
فاعرف ترى الدنيادروس وتجاريب
والكامل الله والنقا للرسولي
لاتصير مشذاب يقص العراقيب
خله وراعي الاوله وش يقولي
أخذت حكمه من كلام اللواعيب
للطيب ناس وللعذارى فحولي

--------------------
أخوكم / ثبيتي والوفا بيتي

[ابوبجاد الرويس]

مشكور اخوي ثبيتي والوفا بيتي

ولاهنت على القصيدة ,,,, وصح لسان الشاعر

[البارع]

مشكووووووووور يابن العم والقصيده منشوره في ديوان
صوتي بعنوان عيون الشعر اخراج تركي ابن خويتم


والشاعر وبلا شك بحر لاقالو بحر وانا من اشدالمعجبين في شعره
لان ابياته جزله ماهيب حشو كلام

[ابو فايح]

الحقيقه هذا الشاعر مظلوم من قبيلته اولا ومن الاعلام ثانيا كل ما سمعت له قصيده قلت هذه اجمل من السابق حقيقه ابياته كلها درر أخي ثبيتي اتمنى منك ان تطرح لنا جميع ماتعرف من قصايد هذا الشاعر ولك مني جزيل الشكر.

التوقيع

عالم تويتر abofayeh@

[مـجـول الـعـصـيـمـي]

مشكور

وصح لسان الشاعر

والله يعطيك العافيه