ايام الشقا.... للشاعر قبلان العتيبي

[ابـن نـعـيـس]

أيام الشقا




للشاعر : قبلان مشعان العتيبي

الله يعين العين لا هبّت من الغرب الهبوب=كنّ المزون الغرّ لا صبّت مطرها صبّها
يفوح صدري بالهموم الوارده من كل صوب=أكبر طبيب مْن الأطبّا ما يحصّل طبّها
تكثر عَليّ مْع الصباح وْلا تقلّ مْع الغروب=تلعب بي أيّام الشقا وانا عَجَزت ألعبّ بها
يا الله طلبتك يا كريم الجُود غفار الذنوب=تطفي لهيبٍ فالحشا فعْل الزمان يشبّها
قلبي لو انه من حجر يمكن من الفرقا يذوب=فرقا العنود اللي برا حدْب المحاني حُبّها
أحبها حب المطر لمْصافح جْبال الجنوب=وأحب حتى ديرةٍ نور العيون ترُبّها
الحب مثل الدم يجري في شرايين القلوب=والاّ كثير الناس حُبّه كذبةٍ يُكذب بها
لا مَرّ طاريها يضيق البال وتضيق الدروب=وأمدح ليال الوصْل ولـْيال الفراق أسبّها
الملح كله والحَلا يا دُوب يكفيها يا دُوب=حتى الذهَب لا لبْسته من زينها ينصبّ بها
ومعَ الجمال اليوسفي ما فيه عيب مْن العيوب=تبارك الله لا اله الا هوَ الله ربّها
يا هاجسي وانت الوحيد وْلا معَك ثاني ينوب=غير القلم والطرْس الابيض واليمين اكتب بّها
إجمع من اللولو جزيره وابْنها بنيان طوب=والـْيا اكتمل بنـْي الجزيره بالجواهر عَبّها
بكتب مدينتها قصيده وأعلن التوبه واتوب=أتوب ؟! لا والله ما اتوب أنْ تبْت أخاف اكبّها
عَليّ محْسوب الشعِر وانا على الشعْر محَسوب=تطرب بيوته كل ما غنيتها واطرب بها
وألبّسه عما يعيبه من لباس الستر ثوب=وأرفع مقامه عن مقام وجيه ما يُحْسب بها

التوقيع