ماهوب سوق اسهــوم لا والله ألغـاز=كلـه حـمر يشبــه لعـرف ألـدجاجي
أو هـو حمار الخبز في فـرن خـباز=وشـبت به الضيــان بشـكلٍ مفـاجي
شخـط به الكــبريت يالربع (جماز)=وقفــل علـيه البــاب ما من خراجي
حتى المطـافي لـو تطفــيه بأهواز=ولـو يـزهم الاسعـاف مالـه منـاجي
الحـرب شـبت بين تاجـر ومعـتاز=واللـي بعد ساهـم بـ(ينساب) راجـي
وأعلى النسب شفناه باسمنت والغـاز=وايضا المصافي.. هـي.. وأم العـلاجي
وشفنا المؤشر جـاه خفـه وهزاز=وروح يطامـر فـوق فيـه ارتـجاجي
تقـول بـه (شطه) (لا) والله تـراز=اثـر المرض في معـدة السـوق لاجي
مجنون، صاحي، بس في حالة إعجاز=ترقـص لـه قلـوب الطمـع بإبتهاجي
قلت الـفرج ما عـاد يالـربع يعتاز=جاكـم وقشـوا سهـوم يضحك حجاجي
بكره نحوش فلوس ونجلس بمركاز=مع (أحمد فتيحي) فـوق في برج عاجي
عليكم بـ(سابك) بها للبترو ارماز =من بطنهـا الألفـين ..ترضـي مزاجي
والمستشار (هـلال) للجـبس منحاز=قال إلحقـه والسـوق جـابه عـجاجي
الخوف خلـه عـنك ثـم كـنك الباز=أطـمر بوسـط السـوق جـاله مراجي
وحرمت طفلي شرب (سن توب) مزاز=ووعـدته مع الأربـاح بقـرب انفراجي
وبكـره نسافـر يم بيـروت ثم كاز=وألـف فيـك الكــون وأروح وآجـي
والطفل يضحـك جـد فرحان( لا )فاز=وهو يحـسب ان ابـوه جـاب العلاجي
ما يـدري انه حـلم في وسط برواز=وطـاح وتحـطم صار مثـل الزجـاجي
وهـوى بوسـط اليـم ساقط ولا فاز=عبـارته يالـربع فيـها انبـعــاجي
راحت جهـودي دون تحصيل وانجاز=وأرجـي المواشي كود تـوزع انعاجي
وآخـذ ثـلاثٍ لو بهـن سـل وانحاز=وانـجى مـن الخسـران ويقـال ناجي
واسرح بوسط البر في ضـان وانعاز=واقـول مـن سـوق الخساره هجاجي
من عقب راح السوق يمشي بمعكاز=والرسـم البياني صار فيـه اعوجاجي
باقفل جهاز (النت) وابا افصل الفاز=وعقـب عـذوبة مـاي باشرب هماجي
الله خلقـنا عـزاز وبنموت بإعزاز=بسبـة طمـع وشلـون نسكن ملاجي؟
« آخـــر الـــمـــشـــاركــــات »
سوق الاسهم ... (سوق الالغاز)
العرض الشجري