(الراحلين)

[ابـن نـعـيـس]

عزي لحالي والديار خلي عقب الراحلين=اللي مضوا درب السفر والبعد طالت مدته
أقفوا وخلوني وقلبي مجزعه كثر الونين=وخلو فراغ فالعمر كل البشر ما سدته
خلوني أبكي بعدهم والهم في قلبي دفين=صكت على قلبي غرابيل الزمان وهدته
صرت أتبع الهوجاس وأسري لا ذكرت الغايبين=كني يتيم مالقا امه راح يتلي جدته
ويلاه يا وجدي عليهم وجد مظلوم سجين=خلوه ربعه يوم ضرب الوقت زادت شدته
خلوه يصرخ ويتطلب مالقا قلب يلين=ضدوه واقفوا دون رحمه والصوادف ضدته
أو وجد عود ذره بنيات ما جاله بنين=خارت قواه وطاح معتل وعجز عن كدته
اليا فتح عينه وإلى هن من يسار ومن يمين=هن مالهن غيره وهو كف المنايا لدته
القلب قطعه البكا ونياطه أبلاها الحنين=يسري ويهرب عن همومه والمصايب ردته
يا طول ليلي بعدهم يا جور دورات السنين=يا ويل قلبي دام سيف الوقت زادت حدته
وعزي لحالي والديار خلي عقب الراحلين=اللي مضوا درب السفر والبعد طالت مدته

التوقيع