عبدالله رجاء العنزي وقصيدة النوايا

[قو الصخر]

(مادامني مرتاح والبال يسمو)

لازان بالك وابتهج عندك الجو.
وراح العماس وشفت فيه ابتهاجه.
وحسبت ماحسبت عن ليت أو لو.
تعرف مضيقات الزمن وانفراجه.
ماكل من يسري على واهج الضو.
يلقى طريقه واضحن من سراجه.
حتى السحاب اللي به بروق مع نو.
من شاف برقة شفت ضحكة حجاجه.
..بعض البشر سوالفه شي محلو.
ايه احذره لاياخذك بالعجاجه.
لاتصير ناقه تنخدع من جسم بو
اعرف لقلب النذل وابعد مداجه
لاقفيت ماتسلم ويشناك بالسو.
مريض قلب ولا لقينا علاجه..
يطبخ غيابك واللحم منه يشتو..
ياكل بنفسه محترق من مزاجه..
هذاك خله ياولد مبطي وتو..
خله لسيات النوايا يواجه..
يدنو من افعاله من الحقد يدنو.
وانته عزيزن ماتبعته لحاجه.
مادامني مرتاح والبال يسمو..
كني امير وماتبعت اللجاجه
مبسوط متهني ونقرا ونتلو..
ماني مثل غيري حبيس الزجاجه..
لاتقتل الفرحه على ليت يا لو..
الحر يكفخ والدجاجه دجاجه

عبدالله رجاء الجعفري