قصيده للشاعر أحمد الناصر

[كاسب الطيب]

أخواني أعضاء الهيلا هذه أول مشاركه لي معكم وهي قصيده للشاعر

الكبير / أحمد الناصر . وأتمنى أن تفيدكم وتنال إعجابكم ......

عيني جزت عن لذة النوم بالليل = لاواهنيّ المهتني في منامه
بس الطواري مقفيات ومقابيل = تقفي وتقبل بي وأنا بالسلامه
ماشفت منه ألا العنا والغرابيل = متساوي متن البعير وسنامه
أمثال للي يرغبون التماثيل = سويتها ... وأهديتها لليمامه
تنـشـَـر وتقراها الرجال المشاكيل = تروح شرق وغرب وأقصى تهامه
يا ( بوحمد) هذا زمان التهاويل = أثر الرجال أشكال ذيب ونعامه
أحدٍ توهق به وهو مثل ماقيل = كنّه على حوش البهايم ردامه
يشيل نفسٍ عجز عن شيلها الفيل = وأكبر مصيبه ينتسب للزعامه
واحدٍ مثل وصف الجمل شايل الشيل = يصبر ولو عضت ضلاف المسامه
وأحدٍ مع أهل الوقت بصر وتحاليل = وأحدٍ تغرّك حشمته واحترامه
وأحدٍ تجمل به ويكرهك بالحيل = وده على قبرك يبني خيامه
نسى الجميل وبدل العدل بالميل = وما ينكر المعروف غير الفدامه
مبدا المعرفه ماتبي فيه تبديل = وأتلى المعرفه بالفلَس والندامه
جمايلك عنده مشى فوقها السيل = سيلٍ يدهدم كل جرف وعدامه
فرق الرجال أبعد من الجدي لسهيل = وأهل العقول أبرك من أهل الغشامه
إن كان ودّك توفي الوزن والكيل = وتنزل الـرجّال مـنـزل كرامه
إليا اشتبهت بوزن بعض الرياجيل = اسمع كلامه واوزنه في كلامه
أما حسبته من حساب المهابيل = ولاّ حسبته من رجال الشهامه
من دون قولت خيلكم ياهل الخيل = الرجل منطوقه له أكبر علامه
من رافق الطيّـب يحوش المحاصيل = ومن رافق الباير يحوش الملامه
المرجله ماهي تجي بالتساهيل = اللي يبا الطولات يكرب حزامه
وكل الرجال عيال تسعة مهاليل = وكلٍ لبس بشت ولبس له العمامه
مار الفخر ماهوب عند المداخيل = ترى الفخر عند الخروج ونظامه
من صد لاتحفي عليه المراسيل = أنصحك لاتلعب عليك الرخامه
السالفه تحتاج شرح وتفـصيل = دايم يغر الناس كـــبـر الجهامه

كاسب الطيب