عيـــد بن حطاب .. قصيدة مدح في الحفاة - الهيـــــــــــــلا *** منتدى قبيلة عتيبة

أبن حشيان · 25-Dec-2011, 12:53 AM

اهداء للشيخ طويق بن مقعد بن طويق

يا طويق يا ابن طويق قالتكم على ماضي الجدود=من يوم ابن مروي و يوم التوم عمر بيتها
و التوم ثبت خطوته في يوم عز ابن سعود=غازي و جا بعده ولد غطا الشيوخ و صيتها
و لا عمرها ضاعت ذهيب ان جا الولد من راس عود=و حاول و شمر و احتزم و تعيش لا رديتها
واصل و حط العود ياابن طويق في عين الحسود=و انت على بالك علوم تبين لو خفيتها
و المرجله عز و كرم و الجود يثبت لك وجود=و انت العلوم الطيبة في سبرتك سويتها
لا قام حضك ساعده و البيت يبنى بالعمود=و سمعتك بانت بالسما بعد العطايا اعطيتها
و الناس ما تمدح بخيل و لا يسود بها الحقود=و الساعة تدور و يفوق من عرف توقيتها
الله عطاك المال لين الناس راحو لك وفود=الناس تضعن للحيا و السيل يحيي ميتها
و لولا كذا قعدت مع ناسن يقال لهم قعود=و انت على عز و شرف فوق النجوم ارقيتها
و انا جذبني عيلمن صدره يخالفه الورود=و وردت يا عد الروى صبحت ما مسيتها
و باختصر لك مطلبي جيبن ليا جيت النفود=امشي و انا مرتاح مااهوجس ليا مريتها
قل تم لا ينقال لي رميك خطا يا ابو سعود=و يقول حساد حاسد يالردي بغيتها و اخطيتها
و لا ينشكى الا للرجال اللي يحلون العقود=و انا الرجال الواطيه و الله ما عمري جيتها
و يا لاد حافي فعلكم معروف ما يبغى شهود=و قصيدة اليابس يشوش الراس لاغنيتها
في مثل يومن نطاق تاريخه مثل عاد و ثمود=تسولف بها شيباننا و من البعيد اوحيتها
و يوم الحميمة و الملح صوته مثل صوت الرعود=و من يومها السور انكسر و يلوم نفسه ليتها
نزل شداده ما غزى لينه تريح في اللحود=وقعاتهم و فعولهم لو تنحصى ما احصيتها
و مجلاكم مع الحارثي و عتابه تلم الجرود=الا اخو هملا وقفته بالغير ما ساويتها
قال الحفاه تعود لعتيبه قبل قدح الزنود=شقر العصا و كسر العصا فتنه و انا طفيتها
و يا لاد حافي كلكم و الله ما فيكم شرود=الحافي الموت الحمر و النار من كبريتها
و الناس كلن فيه خير اللي نقص و اللي يزود=عند القدر مالك مفر تجيك لو ما جيتها
و صلو على سيد البشر و اللعنه لكل اليهود=يعود صهيون البشر و يهود ما سميتها

للشـــاعر عيـــد بن حطاب العضياني

آخر تعديل أبن حشيان يوم 25-Dec-2011 في 12:56 AM.