ღ ♥● آلغآآلية ●♥ ღ - الهيـــــــــــــلا *** منتدى قبيلة عتيبة

حسن إبراهيم الدجيماء · 18-Feb-2011, 03:48 PM

.
للتواصل
.

عليّ هبّي ياذعاذيع المعاني والقصيد = وأستاقي الجزلات لي وأسترسلي فالذعذعة !!
سوق الهبايب للمخايل في ضحى نهار عيد = يوم العباد تمدّ يدها للسما متضرعه !!
الليلة الهاجوس يضربني بمطرق من حديد = والعاطفة والدين والأخلاق تضربني معه !!
تقول : ماخليت أحد فالحدّ الأدنى والبعيد = اللي ماردّد : (( صحّ فكرك يالحسن على سنعه )) !!
وأنته ولافكّرت يوم أنك تسخّر هالنشيد = في ذكر فضل الأم .. يومنّه عديم المنفعه !!
أخذ القلم وأكتب قصيدة .. يالعلّك ماتفيد = مدري متى تصحى وعجلات الليالي مسرعه !!
فزّيت وأدّيت القسم بالخالق الفرد المجيد = إني لسخّر ماعصا من شانها .. وأطوّعه !!
الغالية بنت الرجال اللي يضدّون الضديد = (( ذبّاحة الحيل اللّي إليا عال عايل تردعه )) !!
بنت الشرف .. بنت العفاف .. ومن هل العز التليد = أم التقى .. وأم الورع .. فالضيق ولاّ فالسعه !!
الطاهرة .. والباهرة فالحلم والعقل الرشيد = في ذمتي مامثلها .. لمقابل الله خاشعة !!
لاجيتها دايم كذه .. والله على قولي شهيد = ياراكعة ياساجدة .. ياساجدة ياراكعة !!
هذا سنعها كل يوم وكل يوم وهي تزيد = كلّه لجل رب البشر .. ياخافضة يارافعة !!
غير الحنان اللي يذعذع من وأنا توّي وليْد = يالين هالحينه يهبّ .. من الجهات الأربعة !!
ماأقول غير الله يطول عمرها عمرٍ مديد = ويديم لي عدّ الغلا .. وأشرب وأرِد من منبعه !!
الوصل باقي بيننا موصول بالحبل الجويد = مادامني فوق البسيطة .. والقلوب مربِّعه !!
(( االله يقطع عرق شرياني .. ويلحقْه الوريد = لن كان حبل وْصالها في يوم فكّرت أقطعه )) !!!

.
إحترآآمي
.