ياهاجس الشعر زان القاف وانقادي=القاف ماهمني طوله ولاقصره
شاعرنبط والقصايد داخل فؤادي=واسبح ببحر الشعر من مده الجزره
شاعروشعري ترا موروث الاجدادي=أجيب جزل الشعر وأجيب من ندره
الطيب جاين معي من وقت ميلادي=مثبتن موقفي والطيب مقتدره
ويالله ياللي لك العبادسجادي =يالواحد اللي نردد دايمن ذكره
تنشي سحاب يجي والنو منقادي=من حد حايل عموم اليا وراء الجفره
وعلى عفيف وعلى ضلعان وأنفادي=ويعم كل الوطن في بره وبحره
ويسقي هميج له العربان ورادي=وخشوم رمحه عليها ينتثر نثره
سيله حقوقن يشيل الصمد والوادي=والسيل في مقدمه يسوقلك قشره
ياخذ شهر فوقها صباب وازتادي =وتكثر سيوله على الملزام بالكثره
ومن بعد عشرين يوم يجيك ردادي=يجيك رد الوطا يقال مستتره
غاشن عليها من الصفار لبادي=ومن الخزاماوحوذانه ومن مكره
وتشوف راع القنص يصيح وينادي=يومي بملواحه ليامن دعاءصقره
لاهد صقره على خربن له إجلادي=يجيك متنكسن من فوق لاحدره
يلعب عليها شوي شوي بركادي =ولياقضى لعبته ياخذ بها فتره
ويلكش بمخلابه الوراد الأثنادي=والخرب تلقاه طايح منثلغ نحره
حرن معرف ترامعروف صيادي=مسرولن طيبن مع طوله وجبره
أفجح ليامن وقف وعيونه إحدادي=جبر الثنادي عريض واسعن صدره
وتشوف كل البدو ترعى بالاذوادي=ترعى نبات الوسم لازم في قفره
أمابسودن تميز طول الأيادي=صعك الظهور السمان ولابها فزره
تلقا فحلها جميل الوصف واسنادي=طويل غارب وتلقا فاهقن ظهره
ولابوضحن كما لون القمر بادي=ضفي السبال وغضارفها بها عجره
تلقافحلها بليا إهجار واقيادي=سناد وظهير رأسه كايف بكبره
ولابشعلن تجي لاسمعت منادي=تجيك متحرفه لاسمعت الجظره
تلقا فحلها كمالون الذهب سادي=اليا اعرض تقول خشمه كاسره كسره
ولابصفرن تجي لاسمعت الشادي=تلقا ظهرها كبيرن فاهقن وخره
تلقا فحلها جميلن مابه إنقادي=تكسر لصوت الفحل لاسمعت الهدره
يزينها فالعشب في وسط الخدادي=هذي ولدها قعود وهذي بكره
قدامها جابو الدله وبرادي=وحظر معاميله ومحماسه ونجره
هذي هواء اللي تراماشجع النادي=ماشجع المنتخب لهلاله ونصره
وصفتها وصفي اللي ماهو بغادي =وأنابنظري وكلن مقنعه نظره
هذي طراة العمر والوقت نفادي=وجسم البنادم ترالامات في قبره
والطيب معروف بظعة دوم الاجوادي=والطيب الياتوفى باقين ذكره
والرجل نفسه يجاهدها تجهادي=يصبر على اللي حصل ويجاهد بصبره
يعزنفسه ويرجي ربه الهادي=ويزيد عند العرب من طيبه وقدره
ولاخير في واحدن لناس حسادي=واللي حفر للخوي يطيح في حفره
ويالله تزين لياجا وقت ميعادي=وتحطني يالولي مع صفوة العشره
وسلامتكم
الشاعر:ضاوي عبدالله العتيبي
آخر تعديل ضاوي الشيباني يوم 19-Nov-2010 في 07:14 PM.
19-Nov-2010, 07:02 PM
هواء بالي
العرض العادي
