معوّض خير ياحيٍ تهقوى في الزمان ومال=سنينك لو رقيت بعدلها يطرحك مايلها
تعلّم وإعرف إن الدرب قدامك سهل وجبال=جبال تطولها وجبال بعيونك تخايلها
ومعوّض خير ياحيٍ وردت الماء بدون حبال=يطول بك الوقوف وشربة الماء ماتحصّلها
وقوفك عند راس البير مايسقيك لو فنجال=ولاينفعك شوف الجمه اللي منت طايلها
ومعوّض خير ياحيٍ خدعك من الرجال أشكال=تشوف أشكالها وتحطها أرفع من منازلها
تعلّم من زمانك لاتصير من أجهل الجهال=ترى في كل يوم تجيك عبره لاتجاهلها
إذا ربي وهب لك عقل تلقى في الرجال رجال=تعرف اللي يطلّع قيمتك واللي ينزلها
ترى من بعض مايندي الجبين ويحرج الرجال=لياساق الميانه في نفوسٍ ماتقبّلها
ومهما شفت في صاحبك من نخوه وطيبة فال=ترى بعض السجايا كثرة الإلحاح يقتلها
معاريف الرجال ديون وديون الرجال ثقال=لياصرت متعافي ليش تغرق في جمايلها
رصيدك في حياتك سمعتك مع طيبين الفال=رجال الطيب والمعروف بالمعروف عاملها
ولاتبدي بجاهك في مقامٍ مايسر الحال=ولاتشفع لناسٍ ماتنومسك بفعايلها
لياجاتك تعذّرها مدام العذر له مدخال=ووقت الجد قول لها الصحيح ولاتجاملها
وخذ مني نصيحه لاتصدق كل ماينقال=يجرك للنميمه لين يطرحك بحبايلها
يجيلك ناقل النمّات بهروجٍ تغث البال=سوالف في قفاك وحظك أطيب يوم تجهلها
يبرر بالحميه والصداقه شينة الأفعال=يجمّل صورته بعلومه اللي ماتجمّلها
ولو كانت حميه فيك رد المخطيه في الحال=ولاكان إستمعها في قفاك وجاك شايلها
ترى من جاب لك ودّى وهذي عادة النقال=يحاول يقتنص من فمك كلمه لأجل ينقلها
ومثل ماقال عندك راح عنك وعند غيرك قال= وزوّد عشر فوق الكلمه اللي كنت قايلها
تجنّب مجلسه لاتجلس إلا مع كريم خصال=تحمّل ميلته وإن ملت ميلتك يتحمّلها
ولاتصبر على الجار الردي لوهي ثلاث ليال=تضرك جيرته لوكان بيبانك تقفلها
وبيع الدار بأول سومةٍ تعرض على الدلال=ورزقك عند ربٍ كاتب اللقمه وكافلها
وبنتك لاتزوجها الردي لوهو كثير المال=تربيها على الطالات وتشوّه سلايلها
وكم من لاش يرمي خيبة إبنه فوق راس الخال=لوإن الخال من روس الرجال ومن دلايلها
ليامنك عرفت تميّز الطيّب من البطال=وفادتك التجارب في الحياة وفي مسايلها
وكشفت الفرق مابين الصحيح وحيلة المحتال=وتعلمت الفراسه في الوجيه اللي تقابلها
بعد هذي ترى مالك غنى عن صحبة العقّال=يدلونك برايٍ ينقض الدعوه ويفتلها
يقولون الرجال اللي سوالفهم حِكم وأمثال=ليامن ضاعت الحيله يدل القوم عاقلها
نصيحة واحدٍ جرّب وشاف من الزمان اهوال=يقدّم لك خلاصة هجرةٍ جرّب هوايلها
شاعر الحكمه عبدالله الطلحي=
آخر تعديل فهد الزهراني يوم 27-Oct-2010 في 01:15 AM.
« آخـــر الـــمـــشـــاركــــات »
27-Oct-2010, 01:12 AM
من اجمل ما قرأت ((معـــوض خيـــــــــر))
العرض العادي
