البساط احمدي

[هلال العتيبي]

جابك الحظ مدري كيف ومنين جيت=ياطبيب الخفوق وجرحه السرمـدي
جيت مثل المطر شنّة ورنّة وصيـت=في نواصيه بـرقٍ لامـعٍ وبْـردي
احسبنِّي نسيتـك واثرنـي مانسيـت=ساع شفتك وقلبي صار يعدي عـدي
فز ماكنّ ودّه فـي ضلوعـي يبيـت=لولا انا ماسكن حدب الضلوع بيـدي
قام يهبـد بـلا يمِّـة وكنّـه ونيـت=سايقه ورعٍ اقشـر والمرافـق ردي
ذبّوا الخبت والماطور مافيـه زيـت=وحطّموا كل شيٍّ فيه حتـى البـدي
مير ثبتّ فـي ميقافـي ولا مشيـت=وإلاّ انا لومعي حيلة لاجيك اجْهـدي
ردّني عنْك مبدن راسخٍ بـه ربيـت=ديني وعقلي وخوفي حدنّـي حـدي
ادري انّك بخير وفالحيـاة اهتنيـت=كل هذا وربّـي مـن دواع اسْعـدي
فرحتي فرحة كويتي بنصر الكويـت=يوم عـاد لبـلاده وادبـر المعتـدي
أنت نبراس في ضيّه كتبت وقريـت=كلّ حرفٍ شجيّ وكلّ حـرفٍ نـدي
وانت بدرٍ على شلال نورك سريـت=من ضياك استنير وفي سناك اقتـدي
يارعى الله ليالٍ فـي سمانـا بديـت=مااعرف سهيل والزهرة ونجم الجدي
كلّما اشوفك ابدع لك من الشعر بيت=يوم كنتوا وكنّـا والبسـاط احمـدي
أذكر انّك على اقفال الضماير سطيت=واذكر انّك سرقت النوم من مرقـدي