تكفون يالعضيان فكاكة النوق ... هل سربةٍ تآخذ على القوم دقله

[نايف عناد]

السلام عليكم ورحمة الله وبركاته وبعد
حبيت اشارككم بهذه القصيدة والتي اسندها شاعر قبيلة السهول الكبير الشيخ / شايع بن فراج بن شايع المحلفي السهلي امير مركز العيساوية بمنطقة سكاكا الجوف على الشاعر نايف بن عناد بن شفاي ابن بشير والرد عليها ,,,, والتي آمل ان تحوز على رضاكم واستحسانكم ،،،،

يامل قلـب صايبـه ياولـد روق = هـمٍ بقلبـي يالعتيـبـي لبقـلـه
همٍ بقلبي ينتل القلب مـن فـوق = بْيد بحيلي وأتعـب القلـب ثقلـه
واللي ذبحني يابن الاجواد مخلوق = ادعج غنج من شاف زوله بدقلـه
أدعج غنج ومجدل الراس مفروق = عين أشقرٍ راعيه يطـرب لنقلـه
الصاحب اللي صار للقلب صافوق = حبه صفق قلبي وقلبـي صفقلـه
أنشهد انه صار لي بالهوى عوق = لخبط بعقلـي لخبـط الله بعقلـه
عليه قلبي ينقل الضلـع ويتـوق = توق أشقرٍ صوت المنادي صعقله
تكفون يالعضيان فكاكـة النـوق = هل سربةٍ تآخذ على القوم دقلـه
وأخص منهو يفهم الشعر والذوق = نايف فـوادي بالمـوده صدقلـه

رد الشاعر نايف بن عناد

ياهاجسي جالك من الجـزل طـاروق = واللي يتـوق مـن الطواريـق تقلـه
بهر دلال الشعر مـن غالـي السـوق = البـال رايـق مثـل مـاراق رقـلـه
نبي نجاوب من كـوى قلبـه الشـوق = ولص الهـوى بيـن الحنايـا درقلـه
وأصبح بقلبٍ من هوى الغيد مسـروق = وأسند يبـي فزعـة علـى مانسرقلـه
شاعر جزل والقاف ماهوب مطـروق = معهـد نبـط يمتـاز مـن يلتحقـلـه
ون حـط للشعـار معـدال وحقـوق = شعـر النبـط بـأول شهـادة نطقلـه
ترفع له البيضاء علـى كـل شاهـوق = متفـوقٍ قــدره وقــدره وفقـلـه
يابن السهول اللي لهم مجـد مرمـوق = وكتابهـم بالعـز شـاب الـورق لـه
نخيتتنـي وابليـس كافـر ومرشـوق = فـأمـر تعديـتـه وقلـبـك فهقـلـه
جذبك ياشايـع مـن المزنـه بـروق = وعزي لمن مـزن العـذراى برقلـه
يغيـب فـي غيبوبـة الهـم ويفـوق = ون فـاق نعـاق الـعـواذل نعقـلـه
عنْـاه قلـبٍ كـن ماهـوب معلـوق = وغره بحـر نجـل العيـون وغرقلـه
دل ! وليانة عـود ! والجيـد منتـوق = وأهيف حشى كن الحشى ماخِلـق لـه
ون سلهم برمـشٍ تقـل حـد مذلـوق = خضـب بتعذيـب المعاشيـق صقلـه
عايشت حبٍ راح ! عاشق ومعشـوق = حب الشرف واللي يـدل الطـرق لـه
ماشفت حب اليوم في ثوبـه شقـوق ! = والـحـب الاول روح الله يعـقـلـه
وانته خبيرٍ فالهـوى منـت مطفـوق = اليا طفق له فالعرب مـن طفـق لـه
وقد قيل قبلي كـل مطـرود ملحـوق = الطيـر فالمطـلاع هـد السبـق لـه
وحنا معـك بوجيهنـا ندفـع السـوق = وبـإذن الولـي يهنـأ خفـوقٍ خفقلـه
وكان البخت عن وصل الاحباب معيوق = ركبـي مقفيـن العـرب مـن يعقلـه
هذا وانا فـي ود الاصحـاب موثـوق = وأنت الرفيق اللي ضميري وثـق لـه

وسلامتكم ...

اخوكم : شفاي بن عناد

[ولدعساف]

الله الله ..

صح لسانك و لسان السهلي ..

ونعم بعتيبه عامه و العضيان خاصه ..

محبك ..

,,,

التوقيع

قال أبوبكر الصديق - رضي الله عنه - ( الموت أهون مما بعده، و أشدّ مما قبله ) حسبي الله ونعم الوكيل كتبت وقد أيقنت يوم كتابتي .. بأن يدي تفنى ويبقى كتابها فإن كتبت خيراً ستجزى بمثله .. وإن كتبت شرا عليها حسابها

[علي فلاح العضياني]

الله الله


قصيده رائعه


و رد أروع



صح لسانك يا نايف عناد شاعر كبير ما شاء الله عليك

التوقيع

(( رأس الحكمه مخافة الله ))

[نايف عناد]

المشاركة الأصلية كتبت بواسطة ولدعساف

الله الله ..

صح لسانك و لسان السهلي ..

ونعم بعتيبه عامه و العضيان خاصه ..

محبك ..

,,,

صح بدنك اخوي ولد عساف

ولاعليك زود

تشرف بمرورك

[نايف عناد]

المشاركة الأصلية كتبت بواسطة علي فلاح العضياني

الله الله


قصيده رائعه


و رد أروع



صح لسانك يا نايف عناد شاعر كبير ما شاء الله عليك

شهادة نعتز فيها اخوي علي فلاح العضياني

وشرفني مرورك العطر ،، دمتم بود

[محمد العتيبي]

بيض الله وجهك .. وصح لسااانك .. رد جزل من شاعر جزل .

وصح لسان الشاعر / شايع المحلفي

تحيتي لك

التوقيع

للتواصل عبر twitter تويتر al_bargawy@

[أخو جوزا]

ونعم بالاد عاضي



جذبك ياشايـع مـن المزنـه بـروق=وعزي لمـن مـزن العـذراى برقلـه
يغيـب فـي غيبوبـة الهـم ويفـوق=ون فـاق نعـاق الـعـواذل نعقـلـه
عنْـاه قلـبٍ كـن ماهـوب معلـوق=وغره بحـر نجـل العيـون وغرقلـه



دكتور يانايف صح لسانك ولسانه

[نايف عناد]

المشاركة الأصلية كتبت بواسطة محمد العتيبي

بيض الله وجهك .. وصح لسااانك .. رد جزل من شاعر جزل .

وصح لسان الشاعر / شايع المحلفي

تحيتي لك

صح بدنك اخوي محمد العتيبي ووجهك ابيض


وشهادتك فخر



لك كل ودي وتقديري

[نايف عناد]

المشاركة الأصلية كتبت بواسطة أخو جوزا

ونعم بالاد عاضي



جذبك ياشايـع مـن المزنـه بـروق=وعزي لمـن مـزن العـذراى برقلـه
يغيـب فـي غيبوبـة الهـم ويفـوق=ون فـاق نعـاق الـعـواذل نعقـلـه
عنْـاه قلـبٍ كـن ماهـوب معلـوق=وغره بحـر نجـل العيـون وغرقلـه



دكتور يانايف صح لسانك ولسانه

ماعليك زود اخوي اخو جوزاء


وصح بدنك يالذيب ,,, شهادتك تاج على روسنا


تحياتي وتقديري لك

[سعد الذابح]

الله الله


قصيده رائعه


ورد اروع وقوي بكل المقاييس


نشكرك على اتحاف هذا المنتدى بالصوت والصدى الجميل


من افضل القصايد التي مرت علي في هذا المنتدى