ربعة عتيبة يوم كلٍ وماضيه=يوم القبايل بين صولة وجولة

[مشاري الشلاحي]

السلام عليكم ورحمة الله وبركاته

هذه قصيدة قلتها في زميلي

عبدالله بن مجلّي العضياني العتيبي

والرجل الوفي يستحق المدح وهذا أقل شي أقدمه له

أتمنى أن تنال على إعجابكم

الشعر فتل ونقض تنضم معانيه=ماهو مجرد هرج تقدر تقولة
وليا نضمته لازم أنك توفيه=وتوجهه للي عطيبة فعولة
الرجل راعي الطيب ماني بناسيه=اللي كسب كاس الفخر والبطولة
عبدالله اللي كاسب الطيب بيديه=يوم الردي عيا يصله وينولة
أبن مجلّي مبعداتٍ هقاويه=اللي على الوقفات يشعب ذلولة
رجلٍ يمينه للمواجيب مصخيه=والطيب ماجابه ترى بالسهولة
والصاحب اللي حق الأصحاب يهفيه=أنا أشهد أن الطيب ماهو بحولة
وأنا أشهد أن الطيب مكسب يمانيه=ولاهي غريبه من عيال الحمولة
ربعة عتيبة يوم كلٍ وماضيه=يوم القبايل بين صولة وجولة
لاجاء لها العاني زبنها تذريه=برقا وروق العز رجمة رقولة
ولاجاء لها العايل لعقله تقديه=أهل الكرم والفعل عرضة وطولة
أشهد ويشهد من بعيدة مراميه=ولا نستمع لأهل العقول الجهولة
والمدح لأهل العرف مابه مشاريه=اللوم للي يمدحون الحثولة
الله يحفظ الشايب اللي مربيه=وأهل الوفاء والعرف مثلي دعولة
وحنا مطير العز نرقى لعاليه=ياما نطحنا دولةٍ جنب دولة
أنطوع اللي بان لنا تماديه=أنطوعه يالين يعرف أصولة
لو الجبل يشهد بشيٍ حصل فيه=تشهد جبال طويق وألا سهولة
واليوم حكم العدل ماحدٍ بغاويه=الحاكم أبن سعود ياحي زولة
جواب أبن شالح لأبن روق مهديه=أبغى الجماله وآتمنى قبولة
وختامها المعبود ماحدٍ يساويه=ومحمد الهادي نبيه رسولة

اخوكم/مشاري بن معزي الشلاحي

آخر تعديل مشاري الشلاحي يوم 11-Apr-2008 في 10:33 AM.