عشقت القمر حيث القمر ينبعث به نور,,,

[ابن صنهوت]

عشقت القمر حيث القمر ينبعث به نور=وأخص الليالي البيض تزها ويزهنه
وأحب الهوى لاهب من خايع ممطور=وريح النفل حيث النفل طيب الخنه
واحب الجمالة والجمالة عمل مبرور=واحب الغنى واعز نفسي عن المنة
وأحب الصراحة والصراحة بها مسرور=حيث أن الصراحة تقطع الشك والظنه
وأحب الكريم اللي يفرج عن المعسور=اليا من عطى حتى هله مادروا عنه
وأحب الرجال العارفة وأكره المغرور=من أغتر في بعض المظاهر يغرنه
سقى الله ليالي ماضية قبل هدم السور= نحفر العدود ونشرب الماء من الشنه
ونشوف البنات اليا وردن كنهن الحور=مهار مشاويل بالاعياد معتنة
على الما تشوف بيوتهن كنهن القور=كثير القبايل تقطن العد بالكنه
على البال ذكراها ياليت الليالي تدور=وليت الليالي ماخذنه يجيبنه
تذكرت شيبان لنا يوم حنا بزور =يحثوننا بالطيب والفرض والسنه
وعاشو حياة قاسية في بحر وبرور=عسى الله يعوضهم بما فات بالجنة
ودور مضى من بينهم وين ذاك الدور=زمان مضى له ذكريات يحلنه
يوم أن الذهب مايلبسونه بدون خصور=وجمال النسا ماهو من السوق يشرنه
فقدنا حياة البدو مع شوفة المظهور=ولاعاد به بدو ولا الطرش له حنه

الشاعر سليمان الهويدي