السلام عليكم ورحمة الله وبركاته
هذه اول مشاركة لي في هذ المنتدى الشامخ وهي عبارة عن ابيات متواضعة في مديح اخي العزيز (طراد بن جزا بن سهو الروقي العتيبي )
هذا الرجل السامي باخلاقه ونبله وقف معي وقفة صادقة لايرجوا منها شيئا سوى ان اخلاقه النبيلة وشهامته تحدوه لذلك فقد مرضت ابنتي واحتاجت الى تحويل الى الرياض وتعرفون الواسطات عندنا فحصلت على رقم الاخ طراد وهو لايعرفني مسبقا واخبرته بالتفاصيل فبذل جميع الجهد حتى ادخلت ابنتي مدينة الملك فهد ــ قبل ان يسترد الله امانته ــ واستمر معي في المواصلة كمواصلة اخ لاخيه ومنذ وقت احاول ان اكتب به ابيات لكني لاارها تسمو الى قامته فاتركها واكتشفت اني في النهاية مهما كتبت لن اوفيه حقه ولكن من باب الشكر والعرفان فاني اهديه هذه المتواضعة واجعلها استفتاحية في منتدى عتيبة الهيلا وبالله التوفيق
ستين يوم او يمكـن ازود شويّـه=وانـا تمنينـي هجوسـي بقيفـان
واليا غـدى للفكر روحـه وجيـّه=واخذت انظّـم لي تمـاثيل بالحان
هونت ماهـو ضعـف فالمقدريّـه=لاشك عنـدي ماتجـازي كحيـلان
اعني بها اللي مايبي لـه وصيّـه=رجـل يوقـف فاللـوازم وينبـان
على دروب الطيب سـاق المطيّـه=طبع ٍ بذاته موجـده رب الاكـوان
طراد العتيبي مـن رجـال ٍ وفيّـه=اسم ٍ بصفحات الوفا صار عنـوان
لكن عزمـت اهديـه منـي هديّـه=ابيات تحمل كـل شكـر ٍ وعرفـان
واذكر صنيعه فالظـروف القويّـه=ماهو جزا مني ... ولكن على شان
ابيـّـن انه من كـرام السجيّـه=اللي ليا حان القسـا فعلهـم بـان
رد الثنـا فالطيـب واجـب عليّـه=ماني بمن رده على الطيب جحـدان
يابـن جـزا والله ماهـي جزيّـه=لو اني اكتب بك من الشعر ديـوان
وقفـت مامقصـدك هـذي وذيّـه=الا الاجر من عند خـلاق الانسـان
تحـداك نفـس ٍ للمراجـل شفيّـه=تسعى لنيل الطيب في كل الاحيـان
يوم انها ضاقـت علـيّ الفضيّـه=في ساعة ٍ ماشفت فالناس عـوان
(بنتـي) قبـل ميعـاد رب البريّـه=قبل النهار اللي لفانـي بالاحـزان
كان المرض معها مسـوي قضيّـه=وتحويلها ماكان شي ٍ بالامكان
حتـى تيّسـر رقـم هاتفـك ليّـه=ودقيت , واخبرتك بكل الذي كـان
قلت ابشر الدعـوى تراهـا رخيّـه=يالوايلي لاجيـت كـل القسـا لان
بـلاش فالنخـوة تبيـح الخفيّـه=الوضع هيّن لاتجي وانـت حيـران
نخوى العتيبـي مابهـا عنصريّـه=يبيع فيها العمر ماهـو ب(بلشـان
لكـنّ وفرهـا لـصـد السـريّـه=يوم ٍ يجي يروى به السيف شامان
هـذا كلامـك يازبـون الونـيّـه=قلته وانا لمواجـه الفعـل شفقـان
وانا اشهد انّك جيت نفسك رضيّـه=واثبت من فعلك على القول برهـان
وفيـت يـاراع الوفـا والحمـيّـه=ماانته من اللي طيبهم هرجة لسان
من دون عرف ٍ كان يجمعـك بيّـه=فزعة لي فزعة بني عـم واخـوان
يجزاك ربي فـي جزيـل العطيّـة=وانا اطلبه يحميك عن ميل الازمان
والا سواتـك حـاجـة ٍ عايـديّـه=ماهي غريبه منك يـاذرب الايمـان
انتـه سلايـل لابـة ٍ صيرمـيّـه=متوارثين الطيب شيـب ٍ وشبـان
عتيبـة الهيـلا والافعـال حـيـه=في وقتنا اللي فات او وقتنـا الآن
ادنـى عتيبـي لا تـدور حلـيّـه=تكفيك وقفاته عـن فـلان وفـلان
عسـى حياتـك يالسنافـي مديّـه=وتنعم بخيرات الولي جزل الاحسان
واقبل مديح ابيـات ماهـي مليّـه=لكنهـا يرجـح بهـا كـل ميـزان
مدام فيهـا اسمـك تراهـا غنيّـه=اسمك يعليها ويرفـع لهـا شـان
والا انت فيك المدح ماهـو جزيّـه=لو اني اكتب بك من الشعر ديـوان
بـس اعتبرهـا يالسنافـي هديّـه =ابيات تحمل كـل شكـر ٍ وعرفـان
آخر تعديل سلامة الجعفري يوم 30-Aug-2009 في 08:05 AM.
« آخـــر الـــمـــشـــاركــــات »
30-Aug-2009, 08:02 AM
يابن جزا والله ماهي جزية
العرض العادي
