ستين يوم او يمكـن ازود شويّـه=وانـا تمنينـي هجوسـي بقيفـان
واليا غـدى للفكر روحـه وجيـّه=واخذت انظّـم لي تمـاثيل بالحان
هونت ماهـو ضعـف فالمقدريّـه=لاشك عنـدي ماتجـازي كحيـلان
اعني بها اللي مايبي لـه وصيّـه=رجـل يوقـف فاللـوازم وينبـان
على دروب الطيب سـاق المطيّـه=طبع ٍ بذاته موجـده رب الاكـوان
طراد العتيبي مـن رجـال ٍ وفيّـه=اسم ٍ بصفحات الوفا صار عنـوان
لكن عزمـت اهديـه منـي هديّـه=ابيات تحمل كـل شكـر ٍ وعرفـان
واذكر صنيعه فالظـروف القويّـه=ماهو جزا مني ... ولكن على شان
ابيـّـن انه من كـرام السجيّـه=اللي ليا حان القسـا فعلهـم بـان
رد الثنـا فالطيـب واجـب عليّـه=ماني بمن رده على الطيب جحـدان
يابـن جـزا والله ماهـي جزيّـه=لو اني اكتب بك من الشعر ديـوان
وقفـت مامقصـدك هـذي وذيّـه=الا الاجر من عند خـلاق الانسـان
تحـداك نفـس ٍ للمراجـل شفيّـه=تسعى لنيل الطيب في كل الاحيـان
يوم انها ضاقـت علـيّ الفضيّـه=في ساعة ٍ ماشفت فالناس عـوان
(بنتـي) قبـل ميعـاد رب البريّـه=قبل النهار اللي لفانـي بالاحـزان
كان المرض معها مسـوي قضيّـه=وتحويلها ماكان شي ٍ بالامكان
حتـى تيّسـر رقـم هاتفـك ليّـه=ودقيت , واخبرتك بكل الذي كـان
قلت ابشر الدعـوى تراهـا رخيّـه=يالوايلي لاجيـت كـل القسـا لان
بـلاش فالنخـوة تبيـح الخفيّـه=الوضع هيّن لاتجي وانـت حيـران
نخوى العتيبـي مابهـا عنصريّـه=يبيع فيها العمر ماهـو ب(بلشـان
لكـنّ وفرهـا لـصـد السـريّـه=يوم ٍ يجي يروى به السيف شامان
هـذا كلامـك يازبـون الونـيّـه=قلته وانا لمواجـه الفعـل شفقـان
وانا اشهد انّك جيت نفسك رضيّـه=واثبت من فعلك على القول برهـان
وفيـت يـاراع الوفـا والحمـيّـه=ماانته من اللي طيبهم هرجة لسان
من دون عرف ٍ كان يجمعـك بيّـه=فزعة لي فزعة بني عـم واخـوان
يجزاك ربي فـي جزيـل العطيّـة=وانا اطلبه يحميك عن ميل الازمان
والا سواتـك حـاجـة ٍ عايـديّـه=ماهي غريبه منك يـاذرب الايمـان
انتـه سلايـل لابـة ٍ صيرمـيّـه=متوارثين الطيب شيـب ٍ وشبـان
عتيبـة الهيـلا والافعـال حـيـه=في وقتنا اللي فات او وقتنـا الآن
ادنـى عتيبـي لا تـدور حلـيّـه=تكفيك وقفاته عـن فـلان وفـلان
عسـى حياتـك يالسنافـي مديّـه=وتنعم بخيرات الولي جزل الاحسان
واقبل مديح ابيـات ماهـي مليّـه=لكنهـا يرجـح بهـا كـل ميـزان
مدام فيهـا اسمـك تراهـا غنيّـه=اسمك يعليها ويرفـع لهـا شـان
والا انت فيك المدح ماهـو جزيّـه=لو اني اكتب بك من الشعر ديـوان
بـس اعتبرهـا يالسنافـي هديّـه =ابيات تحمل كـل شكـر ٍ وعرفـان

المشاركة الأصلية كتبت بواسطة زياد الشطيطي (المشاركة 909891) الله الله صح لسانك يا سلامه على الابيات الجزله والتصوير الرائع وكفوو بعتيبه الهيلا وابنها طراد جزا ولا شك ان الطيّب يستاهل المدح وانت من طيبك ما نسيت فزعة الطيّب ما اقول الا الله يجبر مصابك تقبل خالص تحياتي

المشاركة الأصلية كتبت بواسطة عمر العتيبي (المشاركة 910148) وعليكم السلام ورحمة الله وبركاته أولا ً يسرني أن أرحب بك أيها الشهم / سلامه الجعفري وثانيا أسأل الله العلي العظيم أن يجبر مصابك وثالثا ً أقول صح لسانك ونعم بك والله ياولد وايل وماعليك زود وكفيت ووفيت شرفتنا بتواجدك بيننا وننتظر جديدك بشوق احترامي

المشاركة الأصلية كتبت بواسطة ممدوح الروقي (المشاركة 910179) صح لسانك يابن وايل ورحم الله ابنتك وبيض الله وجهه بن سهو الطيب لاتســتغربه من هل الطـــيب *** اللي لهم منهج الطيب خبره اوسع على الاجوادمن فيضت شعيب***واضييق على الانذال من ثقب الابره

المشاركة الأصلية كتبت بواسطة ممدوح الروقي (المشاركة 910194) صح لسانك يابن وايل ورحم الله ابنتك وبيض الله وجهك يابن سهو