:: الله يبيحك يابخيت العطاوي ::

[ماجد المحياني]

السلام عليكم ورحمة الله وبركاته

قصيده متواضعه اتمنى ان تنال استحسانكم

هاض الضمير وقام يعزف له لحون = على وتر فكري يجر الغناوي
يطرب لها الهاجس ويطلب ويعطون = جزل المعاني والقصيد الرهاوي
امعطرن قافي وبالعود مدهون = ومشكله مابين كادي وجاوي
أصوغها وسط الحشا لين يحمون = وأزل شعري مثل زل القهاوي
أسوقها للي لها القلب ممنون = الجادل اللي ماتجي بالمناوي
اللي غدت بالزين عن كل مزيون = وأستيسرت قلبي وقلب الهواوي
اليا أقبلت ماعاد ياسعني الكون = واليا أدبرت زرت الطبيب المداوي
الها وفا من بين الأضلاع مصيون = ولها غلا كلٍ جهل وش يساوي
ماتعرف الفرقا ولا تعرف تخون = وما تقرب اللي بالردى له حراوي
تفننت بين النساء بعدة فنون = وأركت على كبد العذول المكاوي
تطرب ليا سمعت بها الناس يحكون = وتسكر على لبس الدلع والغناوي
تخدش شعور أسماء وميساء وميسون = وتتبع خطاويها عهود ومضاوي
تمشي غنج مثل الظبي تمشي بهون = وتسلب عقول اهل الفعل والحكاوي
لامرت اللي شايلٍ فوقه ديون = اللي حياته بين صبر ورجاوي
يضحك ولو أنه من الدين مشحون = لعيون من تقسى عليه الغطاويِ
صورها ربٍ عنده الرزق مضمون = الواحد الخالق مجيب الدعاوي
ولو أنها شيفت قبل عدة قرون = الله يبيحك يابخيت العطاوي
كان أصبح بشعره مثل قيس مجنون = وراحت علومه بين قاصد وراوي
حفظتها والحب ماهوب مامون = أما سعد راعيه ولا شقاوي
الله يجنبها عن عيون مشطون = والله يكافيها الحسد والبلاوي