كديميس بن صالح العصيمي

[ضاامي وفااا]

ارسل الشاعر كديميس هذه القصيد الغزليه للشاعر ذياب العصيمي

يقول كديميس

ياذياب سلم لي على الربع ياذياب = اسلم وسلم لي على من تواجه
انا بدارٍ كل سكانها اجناب = والقلب هاجوس الغرابيل داجه
خيلت برقٍ في دجا الليل شباب = يشوق مكوي الضمير التعاجه
من عقب ما خلته غدالي تقلاب = من ضيقة الخاطر تقول بزجاجه
البارحه ياذياب عقب القمر غاب = الدمع من عيني سريع اندلاجه
على وليفٍ تل قلبي بكلاب = عليه قلبي ساير الهم ساجه
عليه قلبي تقول يكوى بمشهاب = مشهاب لحامٍ فتح زر تاجه
ماني من يركض على الدبك نصاب = طرد القفا للرجل عيب وسماجه
مشفوح انا في حب تلعات الارقاب = واشرب قراح المي واترك هماجه
وادري عن الطرف الخفي حدر الاسلاب = رمز الهوى ماهوب هرج ولجاجه
الصاحب اللي صافيٍ لي بالالباب = اعرف مواري غايته من حجاجه
واتعب وراه ولو تعرضت الانشاب = وارجيه مثل الي يحسب لخراجه
كني سجينٍ مقعده من ورى الباب = ولحدن سمع في حجته واحتجاجه
مصوبن مني وانا منه منصاب = والكل منا ما حصل له علاجه
الكل منا من مشاكيه ما طاب = جداه تلت ونته من خلاجه
ياراكب اللي للعباعيب جذاب = فرتٍ على اول طلعته من كراجه
لانحنا الخط التوى كنه الداب = واسبق من الصاروخ وقت انزعاجه
فوقه غلامٍ للمهمات لولاب = معايشن بقعا بعدل وعواجه
يلفي لقرمٍ للمواجيب قضاب = يفهم طريق المرجله واندراجه
لا شاف وجه قال حيه وما جاب = يقوم بالواجب على كل حاجه

ارسل جواب الشاعر ذياب على القصيده

ياراكب اللي يصفط الميل بحساب = من وارد السبعه وشد الخواجه
يلحق ولا يِلحق ويطلب وطلاب = ما احسن مع العبله دوي انزلاجه
واليا عطا مع رقرق الحزم ينساب = تقول حرٍ كاسرٍ من رواجه
سواقه اللي يقطع الدرب ما هاب = داس ابنصه وبيديه ماجه
مافوقه الا عدة الدرب وكتاب = حيث ان كتب الخط نصف المواجه
مني كتبت كتاب لخيار الاقراب = كتاب مثل المسك في وسط عاجه
ياللي تودي الخط فكاك الانشاب = بلغ سلامي له نهار التواجه
قوله اليا جيته هلا مع ترحاب = يفرح اليا جيته ويضحك حجاجه
يقوم بالواجب لو انه بمطلاب = نشريه لو يغلي المحرج حراجه
كديميس يشكر ويذكر ولو غاب = قرمٍ من اللي يقطعون الزراجه
وبعض العرب لا جاء نها ر ام غصاب = يصير كنه نعجةٍ من نعاجه
ياعنك ما تلام في حب الاحباب = والود شرع الناس تمشا فجاجه
راع الهوى مايترك الود لو تاب = يشيل شيل مرحلات الحداجه
وراع الهوى قلبه كما الباب بضباب = والود باقصى القلب ساجه ولاجه
الصبر زين وراعي الصبر ماخاب = والضيق من عقبه تصير انفراجه
وكم واحدٍ يرمي الهدف مار ماصاب = هذاك ضيع صيدته في عجاجه

[عبدالرحمن الهيلوم]

صح السانه والله انه شاعر كبير
شكر لنقل القصيده يالغالي

[ضاامي وفااا]

مشكوور يالهيلوم على المرور

[عبد الله الحليفي]

ههههههههههههههه


حنا كيف نقرا القصيده وهي جايه بالعكس

[مرزوق حمدان العتيبي]

...
.

صح لسان الشاعر العملاق ابو صالح...
.. وصح لسان الشاعر الكبير ذياب العصيمي
...
ولاهنت على اختيارك ياضامي ...

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[وافي الخماش]

لا هنت يالذيب وصـح لسان كديميس ولسان ذياب ..


تسلم يمناك لا عدمناك ..

[ضاامي وفااا]

مشكورين على المرور

[فهيد مقعد الرويس]

لاهنت ياضامي وفا

على النقل المميز

لوجوه التميز بلا اي تحيز

وصحة السنة الشعار

تقبل تحيتي وتقديري

[محمد العتيبي]

صح لسان الشاعرين :
كديميس بن صالح العصيمي ..
و
ذيـــــاب الــــعصــيــمـــــــي

التوقيع

للتواصل عبر twitter تويتر al_bargawy@

[/عبد العزيز الجذع/]

صحت السنتهم......



لاهنت يا ضامي...



تحياتي.....