’,’,’, ( يانور ) رد الذود بالهون يانور ,’,’,’

[عمرالروقي]

0
مساكم الله بالخير
ابيات متواضعه000
كتبتها في احد مواسم الربيع0
الماضيه وها أنا أقوم بنشرها لأول مره0
وآمل أن تحوز لو على القليل من رضاكم000

(يانور) رد الذود بالهون (يانور)=خل الفحل يلحقك وأيضا المتالي
رد العشاير لاتفلي على القور=والبل ترى فيها يبين الخمالي
وأنته على طرد الحيا منت مجبور=عاين مغيب الشمس ردم الثقالي
بجمع لك الأغراض وأسبقك (بالمور)=دام الصلاة أديت والفي مالي
عسيت لي قفرن من الأمس ممطور=نبته جديد أنواع والجو خالي
أسقاه ربي بالمساء وسم شختور=برقه سرى بالليل فيه إشتعالي
أبطيت أخيله والحشا في مسرور=معي الشعر (يانور) ماني لحالي
غدران سيله كنها أنهار وبحور=مير البحار أملاح والغيث حالي
سطح الخباري يعكس الشمس بلور=فيه إنعكاس النور منظر خيالي
نبت الخزامى فيه جايله زهور=تشبه زوال ن بسطت بالتلالي
والصاهد اللي مابه جروف وصخور=ابشرك (يانور)بالغيث سالي
وأرض الطبيعه تجمع إسباع وطيور=وألا أم صالح تدرج به تلالي
شفت الضلاع اللي على البعد مزبور=خل الحلال يميل قطره عدالي
فل الغوالي وإجتنب كل مطيور=بعض الأوادم شوفها والجفالي
بعطيك نبذه عن خفا قلب محشور=فيه الهموم تجول نوب أجتوالي
إحكايه الهوجاس في بوك مسطور=من يوم شفت الغيم عانه طرالي
قمت أتذكر ماضي الوقت وعصور=يوم البداوه تاج والراس عالي
يوم المعسس يسهج الارض ويدور=لامر قيس الحول حول المحالي
صاب الحلال هزال والدرب معسور=حالن هزيل وحال قومه هزالي
يبغى يجيب العلم عن برق مذكور=اما جنوب الدار والا شمالي
وان جاب علم الرجع لا شك مشكور=وإن وكد العساس علم الخيالي
احالت البدوان مظهور مظهور=شدوا عن المقطان فوق الحيالي
أخلو جناب العد من صبح وبكور= ويم الحيا يسرون سود الليالي
وان صبح البدوان بالصبح منذور=يستبسل الفرسان عند القتالي
لان الاعادي ترصد الدرب بسبور=عال الجبال وعند روس المفالي
رحلة شقاوه تأخذ أيام وشهور=يتلون حرشا ماتجي بالسهالي
ملحا سناد قبال والبطن مظمور=من كسب قومن باللقا ماتبالي
يرعون نجد الجود وابليس مدحور=لون نجد العز مابه ظلالي
يوم البداوه عز والحال مستور=ماهمهم نقص ن يجي بالريالي
وان كان للمهموم (يانور) دكتور=انا اشهد ان البر خير المثالي
والا (الحظاره) زيف للغير ديكور=مانيب اواليها ولا هيب والي
(يانور) عمك من صناديد ونسور=من روس قومن ماتحب الميالي
ربعه عتبيه نار والإسم مشهور=نعم الرجال اللي تضد الرجالي
قومن على رقي العلا كنها صقور=ماتاكر الا عال روس الجبالي
تبني بيوت العز ماتبني خدور=روس الرجال مخلفين العيالي
وصلاة ربي عد ماطار عصفور=وعداد ماطل الشهر بالهلالي
على النبي الهاشمي جهر وسرور=فأول جديد القاق وآخر مقالي

0
وسلامتكم جميع
0
(هامش_نور:راعي الحلال (سوداني)