وش يسلي خاطـري !!!!

[ابـن نـعـيـس]

يوم عيني شاقها البراق مع وجه العشيـه=ما تخيلت المطر والسيل وارباب السحابـي
لين سمّر بارق المزنه معه صوت ابرديـه=وامتلت من سيلها الجيان وبطون الشعابي
كل ذعذاع الهوى تقسيم ناوي وسمسميـه=لا تهزع بالغصون ولامست وجه الترابـي
ما نتبهت الا وانا اجاذب لحون السامريـه=عقب شفت البرق يبرق والمطر غرق ثيابي
وان دعاني للقصايد والحـروف الابجديـه=كني اشيل القصايد من يدينـي فالمخابـي
كل ما يطري على بالي ونار الشوق حيـه=الغلا والشوق يدفعني لها من حـر مابـي
الغزال اللـي تتـل القلـب بحبـال قويـه=اوقعتني لين شفت الموت من قوة صوابي
بالعيون اللي نظرها ياخذ النفـس البريـه=نظرته سيف من الرحمه وسيف من العذابي
ما تحملت العيـون الفاتنـه والساحريـه=ولا تحملت اشقر المجدول والعود الربابـي
يـوم علقنـي وخلانـي ونظراتـه عليـه=كن قلبي تطعنه مع فزّته حـدب الجنابـي
وش يسلي خاطري لو جلت في نجد العذيه=غير تبديد الهموم وما حوت صفحة كتابي
وان ذكرته لجت الأفكار مع وجه العشيـه=يستر الله لا طرى في بالي اشقـق ثيابـي

التوقيع