هـــــــــذه القصيدة للشاعر / محمد فلحان طراد الهوراني المقاطي
مناسبة القصيدة :
رزق الله الشاعر بمولود قبل عدة أشهر فأطلق عليه أسم يحبه الجميع ( سلطان )
فهاضت أشجانه وخواطره وأبحر بخياله في أعماق رمز القبيلة وأمجادها ومآثرها العظيمة ومبادئها الراسخة
وفي نهاية القصيدة يحيي الأمير فيصل بن سلطان بن جهجاه
سلطان سميتك على الشيخ سلطان=شيـخ الفخر والمجد عـز القبيله
شيـخ الشمل لا قالوا الناس عتبــان=الأمــر والتـدبيــر لـه ينتحي لـه
شيخٍ على اشداده كما طويق وأبان=لأمـره الإعصــار مـا يرتخي لـه
قـاد السفينة بالخطر لأمـن وأمــان=حتى رست شـط الفيايا الضليله
سـاد القبيلة ولا تهـاون ولا خـــان=مــا سجل التاريخ فوقه فشيله
يقلط على صعب المهمات مـا هــان=ويـروض اللي مشكلتها عضيله
لـو حاجته عنـد الأسـد بـين نـيـبان=يفتكها بالعزم وألفــين حيـــله
منصى عربنا قمة الجود وأحسـان=من قام له حظ السـعد يهتني له
مـن دون ربـعه للصعـيـبات مــا لان=يبرز لـها وأصعابها تستوي له
يضرب بفكره ضربت الرمح وسنان=ويـرجح بمـيزان الـحمول الثقيله
حـاز المكــارم كلها طــير شيـهان=ذروة سنـام المجـد لـه يعتلي له
يغنيك فيـه الأسـم معنى وعنـوان=أسـمه على فعله رسم لك دليله
بايـن فراغه في عرينه للأعيـــان=مـا ضنتي سـلطان نلقى بـديــله
مثـل القمر بالليل يزخر وله شــان=ما تغني نجوم السماء في رحيله
مرحوم يا شيـخ لك الخلد مسكـان=تــنزل بأمـان الله مجــاور خليـله
يا نسل من قادوا عتيــــــــبة والأضعان=واستوطنوا في نجـد يوم المهيله
يوم العرب فرقان وشيوخ عربـان=كــل شـهر سـيفه ويعـن خيـــله
هـذا طـريح فـوقه الخيـل طوفـان=وهـذا طـريـد مـن يـأمـن سبيــله
وحنـا عتـيـــــــبة نشعل الضوء نـيران=عــدونـا مــا بــين نــار وفتيــله
نحمي حمـانا بالسواعـد والأيمان=والسيل في مجراه من ينتصي له
وتاطا مطايانا على روس عـدوان=واللي نـوانـا فـي محـله نجي له
بمصقلاتٍ تـرهـب الإنــس والجـان=مـن شافها تـزري عظـامه تشيـله
وترعى رعايانا على كيف ماكان=وصغــيرنا بالعمـر يـمنـع دخيـله
وشيوخنا روس المشايخ والأعيان=دائــم مـقاديــم الخيــول الأصيلة
تـرد على حـوض المنـايا بميــدان=وتروي حدود المرهفات الصقيله
ذوي حمــد منبع زعامه وفرسان=إن غــاب شيـخ حـل شيـخ مثيله
بنــوا لنــا مجـــد مثبت بالأركـان=يبلى الـورق والـزركلي ما يزيله
تركي صليب الرأي حكمة وبرهان=عــدل بحـد السيـف حظه وميله
قاد الجموع المبعده خيل قحطان=بعـد امنـعونا نبت وبـل المخيـله
وانشد عن محمد أهل قصر برزان=يـوم الـرحاء يشهد نهاره وليله
ما تؤخذ الـديره وحـلوات الألبـان=ما دام أبن هندي عرض بالكحيله
وعقاب بن شبنان لعـداه طـعـان=قــرم على مهــر يهــزك صهيـله
وعبيــد والعفـار فينـا جنــاحان=شيــالة البـيرق للـرأس الطـويله
وسلطان راع الدين زيزوم الأخوان=لبى نـداء التوحيد لما دعي له
وصل الحجاز بجيش قاده بالإيمان=نعم الفتى سلطان سلطان جيله
واليوم حنا أخوان في جوف الأوطان=الدين يحكمنا بمــيزان كيله
ما عـاد به فتنه ولا نعبد أوثـان=نحمي حياض الدين مع سلسبيله
وحي الأمير اللي سلك نهج جدان=سيـد ولـد سيـد مشا بالفضيله
يـفداك راس المال تفداك الأبدان=ربعك على اليمنى سيوف سليله
على الشرف والخير حنا لك أعوان=يا فيصل السلطان راع الجميله
أنت الأمل في عين شايب وشبان=أنته وريث المجد وأنته وكيله
وأهديك من عندي نصيحة بميزان=ما يفطن إلها كود ناس قليله
أغلى من الماء في شفا فم عطشان=وأغلى من علاج الجروح العليله
أمسك حبال الدين للبني سيسان=ترفعك والدنيا تجي لك ذليله
وأحذر من الدنيا زباريق شيطان=تخدع غشيم الناس واعزتي له
ملاحظة : لا نعلم هل القصيدة وصلت إلى الأمير فيصل أم لم تصل بعد
« آخـــر الـــمـــشـــاركــــات »
31-Mar-2005, 01:07 AM
قصيدة موجهة إلى الأمير سلطان بن جهجاه رحمه الله وأبنه الأمير فيصل .....
العرض الشجري