غريب الوقت

[متعب ثواب الجعيد]

طلبتك ياعليم بسر خلقه = الا يالله ياجزل الوهايب
تسيرني على درب الهدايه = وتقبل توبة اللي جاك تايب
تونسني بدار ٍ غير هاذى = ليا حطوا على قبري نصايب
بعدها شفت شي ٍ في زماني = يقود المعرفه قود الركايب
غريب الوقت من غبر الليالي = يخلي راعي الافكار شايب
اشوف الوقت اله روحه وجيه = يصافقنا مثل صفق الهبايب
ليا منه صفى لي في شرابه = مثل كاسٍ عليه الشهد ذايب
تعكر ثم حاس الله مريره = تغثبر مشربه ما هو بطايب
انا فالوقت الي بعض التجارب = وانا في وقتنا شفت العجايب
ابا اذكر بعض ماشفته وعفته = يزيد بداخل القلب اللهايب
لقيت طبوع فالعالم غريبه = و يظهر تالي الدنيا غرايب
علامات النهايه قد بدت لي = بعد ما شاخ سكان الخرايب
وصار الشور للي زاد ماله = وراع العرف ما رايه بصايب
وابه ناس ٍ تعلى بالمهايط = وهذي يا عرب والله مصايب
وكم واحد يغر الناس زوله = وهو علة نحر قربه نشايب
اثر حقد الاعادي شي عادي = لقيت الموت في حقد القرايب
يكن الكره في صدره يكنه = ولو انه ضحك بالسن خايب
عليك يشن غاره فوق غاره = يجند لو تبي عدة كتايب
تفقد واش وراء هذا التجافي = ولا تلقى خطاء والا سبايب
تعلي مركزه ودك تعزه = تدافع عنه في حاضر وغايب
ويهدم كل صرح قد بنيته = ولا يدري ولا يخشى عقايب
ليا منك نخيته ما ليقيته = يبي يشقيك في كثر الطلايب
وشفت اشكال ياربي دخيلك = على درب الردى شبت شبايب
يشبون الفتن شب الفتيله = وتبلش بين موشيها وعايب
هذا بعض النماذج واسمحولي = تخلي راعي الافكار شايب
اخير القول اصلي ثم اسلم = على خير البشر عد الترايب