ماني براعي سوق ياراعي السوق

[محمد المرشدي]

قصيده بعد رجوعي من احد اسواق الرياض




ماني براعي سوق ياراعي السوق
ياكود لي في وسط مركزه حاجه

لا من دخلته صرت بالحيل مخنوق
كني مكبل مايرى الا سياجه

ابليس في وسطه له الطاق مطبوق
يرمي محابيله ويضحك حجاجه

يجذب على الغفله من الخلق مطفوق
ويغوي خفوقه لين يحلى مزاجه

يرسل على قلبه تفاكير وطروق
ويطرق حداها لين يلقى عواجه

ويشيل وزره فوق الامتان برفوق
وهذا من المشوار صافي خراجه

بين العرب من كل لهجه ومنطوق
كثروا علينا مقلدين الخواجه

الهرج مايع والطبايع على الذوق
والشكل تبغى تمدحه قل سماجه

شبابنا ينساق خلف العدو سوق
صوب المياعه والدلع والغناجه

صور له الاعلام هالغرب مرموق
وصور له الاجداد جهل وهماجه

اعلام ن مشوه وفاسد و محروق
اهدافه اكبر من برامج نتاجه

يبغى الشباب يغنى الحب والشوق
ويترك حديث الترمذي وبن ماجه

الله يخيب كل مسعاه من فوق
ويهدي شباب المجتمع لاحتياجه

اسلامنا هو درعنا عن هل البوق
لو نتركه صرنا سوات الزجاجه

دايم تكسر كل مامرها عوق
هشه ولا تقاوم لريشة دجاجه

وصرنا فريسة كل خاين و ممحوق
ذيب ن درع فينا وحنا نعاجه

واسلامنا لا صار ثابت ومصدوق
والله يضمد كل جرح بعلاجه